काठमाडौं । काठमाडौंको भृकुटीमण्डपमा शुक्रबारदेखि जारी २६औँ पुष्प मेला (फ्लोरा एक्स्पो) सोमबार सम्पन्न भएको छ । चौथो दिनसम्म एक करोड १० लाख ७० हजार रुपैयाँभन्दा बढीको कारोबार भएको छ । चौथो दिन मेलामा १० हजारभन्दा धेरैले अवलोकन गरेका छन् भने अन्तिम दिनमात्र २१ लाख ८० हजारको कारोबार भएको छ  । 

सोमबारसम्म चलेको यो पुष्प मेला अवधिभरमा ५९ हजारभन्दा बढीले अवलोकन गरेको र एक करोड १० लाख रुपैयाँभन्दा बढीको काराबार भएको फ्लोरिकल्चर एसोसिएसन नेपाल (फ्यान)का वरिष्ठ उपाध्यक्ष तथा मेला संयोजक रामबहादुर तामाङ (सुनिल)ले जानकारी दिए । 

मेलामा व्यावसायिक ६७, ल्यान्डस्केपिङ एक, अफिसियल १०, प्रतियोगितात्मक प्रदर्शनी दुई र फुडस्टल तीनसहित जम्मा ८३ वटा स्टल रहेका थिए । मेला अवलोकनका लागि सर्वसाधारणका लागि एक सय पचास र विद्यार्थीका लागि एक सय रुपैयाँ प्रवेश शुल्क तोकिएको र ज्येष्ठ नागरिकलाई भने निःशुल्क प्रवेशको व्यवस्था गरिएको थियो । 

एक्स्पोमा आलंकारिक बोटबिरुवा, सिजनल फूल बिरुवा, सुनखरीका फूल बिरुवा, फलफूलका बोटबिरुवाहरूको कारोबार भएको कार्यक्रम संयोजक तामाङले जानकारी दिए ।