काठमाडौं । लक्ष्मी सन्‌राइज बैंकको अगुवाइमा सहवित्तीयकरणमा सहभागी बैंकहरू र कालीगण्डकी गर्ज हाइड्रोपावरबीच लगानी सम्झौता भएको छ । बिहीबार मुस्ताङ र म्याग्दी जिल्लामा अवस्थित कालीगण्डकी नदीमा निर्माण गर्ने १८० मेगावाट क्षमताको कालीगण्डकी गर्ज जलविद्युत आयोजनामा लगानी गर्ने सम्झौता भएको हो ।

सो आयोजनाको कुल लागत ३९ अर्ब ५० करोड २४ लाख रुपैयाँ रहेको छ । यो सहकार्यले नेपालको नवीकरणीय उर्जा परिदृश्यमा महत्त्वपूर्ण भूमिका खेल्ने बताइएको छ ।

कालीगण्डकी गर्ज जलविद्युत् आयोजनाले २०७५ फागुन २७ गते विद्युत् विकास विभागबाट विद्युत् उत्पादनको अनुमति लिएको थियो । साथै, २०७९ फागुन १७ गते नेपाल विद्युत् प्राधिकरणसँग विद्युत् खरिद–बिक्री सम्झौता समेत गरिसकेको छ । सो कम्पनीको मुख्य प्रवर्द्धकको रूपमा संघाई ग्रुप, विशाल ग्रुप तथा ज्ञानेन्द्रलाल प्रधान छन् ।

लक्ष्मी सन्‌राइज बैंकको नेतृत्वमा सहवित्तीयकरणमा सहभागी बैंकहरूले परियोजना लागतको ७५ प्रतिशत लगानी गर्ने प्रतिवद्धता जनाएका छन् । बाँकी २५ प्रतिशत रकम सो कम्पनीका संस्थापक तथा सर्वसाधारणबाट लगानी हुनेछ । बैंकको प्रोजेक्ट फाइनान्स (टर्म लोन) प्रतिबद्धता ९ अर्ब रुपैयाँ रहेको छ ।

सह–अगुवा बैंकहरूको रूपमा रहेका ग्लोबल आइएमई बैंकको सात अर्ब १२ करोड ६० लाख रुपैयाँ र सिद्धार्थ बैंकको पाँच अर्ब रुपैयाँ रहेको छ । अन्य सहभागी बैंकहरू हिमालयन बैंकको तीन अर्ब, नेपाल एसबिआई बैंकको तीन अर्ब रुपैयाँ र एभरेष्ट बैंकको दुई अर्ब ५० करोड रुपैयाँ समेत गरी कुल प्रोजेक्ट फाइनान्स २९ अर्ब ६२ करोड ६० लाख रुपैयाँ रहेको छ ।

सो आयोजना जुन २०२९ भित्र निर्माण सम्पन्न भई विद्युत् उत्पादन भएपश्चात वार्षिक करिब १०५६ गिगावाट आवर इनर्जी विद्युत् राष्ट्रिय प्रसारण लाइनमा जडान हुनुका साथै ठूलो स्वतन्त्र उर्जा उत्पादकमध्य एकको रूपमा रहने बताइएको छ ।