काठमाडौं । भारतको विद्युतीय सवारी निर्माता 'टाटा डट ईभी'को नेपालस्थित एकमात्र आधिकारिक विक्रेता सिप्रदी ट्रेडिङले कर्भ डट ईभीको टप भेरियन्ट सार्वजनिक गरेको छ ।

काठमाडौंमा आयोजित 'टाटा ईभी : चार्जज्ड फर द फ्युचर' कार्यक्रममा सिप्रदीका प्रमुख कार्यकारी अधिकृत राजनबाबु श्रेष्ठ र टाटा मोटर्सका अन्तर्राष्ट्रिय बिजनेस हेड यश खण्डेलवालले कर्भ डट ईभी सार्वजनिक गरेका हुन् । टाटा कर्भ ईभीको टप भेरियन्ट मूल्य ५६ लाख ९९ हजार छ ।

सोही कार्यक्रममा कर्भ ईभीका साथै टाटाका नयाँ गाडीहरू नेक्सन केथ्री डट ईभी र टियागो डट ईभी २०२५ को मोडल पनि नेपालमा डेलिभरी सुरु भएको घोषणा गरिएको छ ।

कार्यक्रमलाई सम्बोधन गर्दै टाटा पेसेन्जर इलेक्ट्रिक मोबिलिटी लिमिटेडका अन्तर्राष्ट्रिय व्यापार प्रमुख यश खण्डेलवालले भने, “टाटा ईभीः चार्जज्ड फर द फ्युचरले नेपालको समग्र ईभी इको सिस्टमलाई सबल र सुदृढ गर्ने प्रति टाटाको प्रतिबद्धतालाई पुनः पुष्टि गर्दछ । हाम्रो उद्देश्य भनेको नयाँ र गुणस्तरयुक्त उत्पादनमार्फत समग्र नेपाली यातायात प्रणालीको विद्युतीकरणको दिशामा सकारात्मक योगदान गर्नु हो । नेपालमा कर्भ ईभीको प्रवेशसँगै विशिष्ट प्रकारको अत्याधुनिक एसयूभी कुपे डिजाइनको सुरुवात भएको छ। प्रभावकारी रेन्ज र नयाँ प्रविधिले सम्पन्न यस गाडीले नेपाली अटो बजारमा ‘प्रिमियम मोबिलिटी’ लाई साँच्चै सम्भव बनाएको छ ।”

कर्भ डट ईभी टप भेरियन्टको विशेषताहरू :

कर्भ डट ईभी टप भेरियन्ट ईभी आर्किटेक्चर 'एक्टी डट ईभी'मा आधारित छ । यसमा ५५ किलोवाट आवरको ब्याट्री प्याक र ९८ किलोवाट क्षमताको इलेक्ट्रिक मोटर छ । यस्तै, ५०० लिटरको बुट स्पेस र १८६ एमएमको ग्राउन्ड क्लियरेन्स भएकाले नेपाली बाटोमा सजिलै आरामदायी यात्रा गर्न सकिने छ । नेपाली बाटोमा सजिलै ३८० किलोमिटरको रेन्ज पाउन सकिन्छ ।

यसमा एडीएस लेभल २ को क्षमता, ६ वटा एयरब्याग, अल ह्विल डिस्क ब्रेक, अटो होल्ड, हिल स्टार्ट डिसेन्ट असिस्ट, ३६० डिग्री क्यामेरा, आई भीबीएससहितको ईएसपी रहेको कर्भ ईभीले सुरक्षा र आराम दुवैको स्तरलाई बढाउँछ ।

गाडीमा ३१.२४ सेन्टिमिटरको सिनेमाटिक टचस्क्रिन इन्फोटेन्मेन्ट, २६.०३ सेन्टिमिटरको डिजिटल ककपिट, भ्वाइस–असिस्टेड पानोरामिक सनरुफ, मल्टिमुड एम्बियन्ट लाइटिङ, भेन्टिलेटेड सिटजस्ता विशेषता छन् ।

यस एसयूभीमा सरल र सहज चार्जिंङका लागि घरको भित्तामा जडान गर्न मिल्ने ७.२ किलोवाट एसी र डीसी फास्ट चार्जिङको सुविधा छ, जसबाट १०–८० प्रतिशत चार्जमात्र ४० मिनेटमा पूरा गर्न सकिन्छ ।