काठमाडौं । सूर्य नेपाल एनपीजीए टुर च्याम्पियनसिपको पहिलो दिन मंगलबार तोरणविक्रम शाहीले सानदार सुरुआत गर्दै ४ स्ट्रोकको अग्रता लिएका छन् ।

उनले ७–अन्डर ७५ को सानदार स्कोरमा दाबेदार निरज तामाङ र सञ्जय लामालाई ४ स्ट्रोकले पछि पारेका हुन् ।

गोकर्ण गल्फ क्लबमा तोरणले उत्कृष्ट प्रदर्शन गर्ने क्रममा फ्न्ट नाइनमा चार बर्डी प्रहार गरे । दोस्रो, तेस्रो, पाँचौँ र नवौँ होलमा एक–एक सट बचाए ।

आठौँ होलको बोगीलर फ्रन्ट नाइन ३–अन्डर ३३ मा पूरा गरे । यही लयलाई निरन्तरता दिँदै ब्याक नाइनमा बोगीरहित ४–अन्डर ३२ को उत्कृष्ट प्रदर्शन गरे । ११औँ, १३औँ, १५औँ र १७औँ होलमा चार बर्डीको सफलता प्राप्त गरे ।

निरज र सञ्जय दुवैले ३–अन्डर ६९ को स्कोर गरे । उनीहरूले दोस्रो स्थान बाँडे । यो सिजन उच्च लयमा रहेका निरजले तेस्रो, पाँचौँ र सातौँ होलमा बर्डी प्रहार गरे । फ्रन्ट नाइन ३–अन्डर ३३ मा सकाए ।

त्यसपछि ११औँ होलको बर्डीका विरूद्ध १३औँ होलको बोगीले ब्याक नाइनमा इभन–पार ३६ को नतिजा निकाले । निरजले यो सिजन दुई उपाधि जितिसकेका छन् ।

सञ्जयले फ्रन्ट नाइनमा लोभलाग्दो प्रदर्शन गरे । पहिलो, तेस्रो, चौथो र सातौँ होलमा बर्डी प्रहार गरे। बोगी रहित ४–अन्डर ३२ मा फ्रन्ट नाइनको खेल सकाए । ब्याक नाईन भने उनले सोही लयलाई निरन्तरता दिन सकेनन् । १–ओभर ३७ मा चित्त बुझाए ।

१०औँ होलको वोगी सहित ब्याक नाईन सुरु गरेका सञ्जयले ११औँ र १३औँ होलमा बर्डी प्रहार गरे । तर १६औँ र १८औँ होलमा एक–एक सट खेर फाल्दा निरजसँग दोस्रो स्थान बाँड्न बाध्य भए ।

दिनेश प्रजापति, जयराम श्रेष्ठ र टंक बहादुर कार्की समान २–अन्डर ७० को स्कोर गर्दै चौथो स्थानमा छन् ।

एमेच्योर तर्फ डिफेन्डिङ च्याम्पियन सदभाव आचार्य शीर्षस्थानमा छन् । उनले इभन–पार ७२ मा पहिलो दिनको खेल सकाउँदा राष्ट्रिय टिमका सदस्य राहुल विश्वकर्मा र बाबु पौडेललाई ३ स्ट्रोकले पछि पारे ।

राहुल र बाबुले ३–ओभर ७५ को कार्ड तयार पारे । चार दिने प्रतियोगितामा ३० प्रोफेसनल र ९ एमेच्योरगरी कुल ३९ गल्फरको सहभागिता छ । ३६ होलको समाप्तिमा कट लागु हुनेछ । शीर्ष २१ खेलाडीले बाकी ३६ होलको लागि स्थान सुरक्षित गर्नेछन् ।

प्रतियोगिताको कुल पुरस्कार राशी ८ लाख ८२ हजार रुपैयाँ रहेको छ । विजेताले एक लाख ५० हजार, उपविजेताले १ लाख र तेस्रो हुने खेलाडीले ७५ हजार रुपैयाँ प्राप्त गर्नेछन् । शीर्ष २१ स्थान सम्म प्राप्त गर्ने प्रोफेसनल गल्फरले नगद पुरस्कार प्राप्त गर्नेछन् ।