काठमाडौं । म्यानचेस्टर युनाइटेडका पूर्वमुख्य प्रशिक्षक एरिक टेन हागले म्यानचेस्टर युनाइटेडमा आफनो कार्यकालका दौरान टिममा सुधार ल्याउन अपरिहार्य रहेको स्वीकारेका छन् । युनाइटेडका पूर्वप्रशिक्षक टेन हागले आफ्नो कार्यकालमा युनाइटेडले केही उपलब्धि हासिल गरे पनि त्यो पर्याप्त नभएको बताएका हुन् ।

“मैले कुन कुरालाई मिस गरेको छु भने त्यो ओल्ड ट्राफोड नै हो । हामीले उत्कृष्ट स्तरको खेल पस्केका थियौँ । तर, कहिलेकाहीँ राम्रो मात्र भएर पुग्दैन । टिमले अझै राम्रो गर्नुपर्छ,” एक अन्तर्वार्ताका दौरान टेन हागले भने ।

सन् २०२२ देखि डच प्रशिक्षक टेन हागले दुई वर्षका लागि म्यानचेस्टर युनाइटेडको नेतृत्व सम्हालेका थिए । युनाइटेडले प्रशिक्षक टेन हागसँगको सम्झौता एक वर्ष थपे पनि अक्टोबरमा उनी बर्खास्तीमा परेका थिए ।

पछिल्लो साता टेन हाग बोरुसिया डोटमन्ड र फेयेनुर्डसँग सम्झौतानजिक रहेको अन्तर्राष्ट्रिय सञ्चारमाध्यमहरूले खुलाएका थिए । तर, दुवै क्लबमा क्रमशः निको कोभाक र रोबिन भान पर्सीलाई मुख्य प्रशिक्षकमा नियुक्त गरिसकेका छन् ।