काठमाडौं । ग्राहक सेवा विस्तार र लगानीकर्तालाई थप सहज तथा प्रभावकारी सेवा प्रदान गर्ने उद्देश्यले त्रिशक्ति सेक्युरिटिजले आफ्नो पाँचौँ शाखा विस्तार गरेको छ । त्रिशक्तिले ललितपुरको ललितपुर महानगरपालिका–५, जावलाखेलमा नयाँ शाखा कार्यालय शुभारम्भ गरेको हो ।

नेपाल स्टक एक्सचेन्जका अध्यक्ष शोभाकान्त पौडेल र ललितपुर महानगरपालिका–५ का वडा अध्यक्ष विकाशमान श्रेष्ठको उपस्थितिमा उक्त शाखा कार्यालयको शुभारम्भ गरिएको हो ।

अध्यक्ष पौडेलले सेयरबजारको जोखिम तथा प्रतिफलको बारेमा जानकारी दिएका थिए । पौडेलले पुँजी बजारको विकासमा ब्रोकर कम्पनीहरूको योगदान उल्लेखनीय रहेको बताए ।

कम्पनीले यसअघि पुतलीसडक केन्द्रीय कार्यालयका अतिरिक्त पोखरा, महेन्द्रनगर, हेटौँडाबाट डिम्याट, टी.एम.एस. लगायतमा सेयर कारोवारसम्वन्धी सेवाहरु प्रदान गर्दै आएको छ ।