काठमाडौं । नेपाल स्टक एक्सचेन्ज (नेप्से)को आधिकारिक कर्मचारी युनियन नेप्से कर्मचारी संघले नयाँ प्रमुख कार्यकारी अधिकृत (सीईओ) छनोट प्रक्रिया अगाडि बढाउन दाबाब दिएको छ । संघले विज्ञप्ति जारी गर्दै हालका सीईओ कृष्णबहादुर कार्कीको कार्यकाल सकिन लागेको भन्दै नेप्सेको पुनर्संरचना गर्न सक्नेलाई जिम्मेवारी दिनुपर्ने उल्लेख गरेको छ ।

अहिलेको अवस्थामा समग्र पुँजी बजरको विकास र लगानीकर्ताको हितमा प्रभावकारी कार्य गर्न पुँजी बजारको विषयमा ज्ञान भएका सक्षम नेतृत्वको आवश्यकता रहेको नेप्से कर्मचारी संघका अध्यक्ष नवराज थापाले बताए । त्यस्तै, वर्षौंदेखि नेप्सेको पुँजी बजारको पुनर्संरचनाको कुरा उठेको भन्दै यसलाई समाधान गर्न सक्ने क्षमतावान व्यक्तिलाई नेप्सेको सीईओ बनाउनुपर्ने अध्यक्ष थापा बताउँछन् ।

नयाँ आउने सीईओलाई नेप्सेको पुनर्संरचना गर्ने, साना तथा मझौला कम्पनीको सेयर कारोबार गर्ने/गराउने, नयाँ कारोबारयोग्य औजार ल्याउने, प्रविधिलाई अद्यावधिक गराउनेलगायत चुनौतिपूर्ण अवस्था रहेको थापा बताउँछन् ।

सरकारले पनि 'हाम्रालाई भन्दा राम्रा र योग्य व्यक्तिलाई' नेप्सेको सीईओ बनाउनुपर्ने उनी बताउँछन् । 

हालका सीईओ कार्कीको कार्यकाल यही माघ २५ गते सकिँदै छ । उनी अहिले नियमित कार्यालय आइरहेका छन् । कार्की ०७८ माघ १७ गते नेप्सेको सीईओमा नियुक्त भएका थिए ।