काठमाडौं । नेपालमा आइतबार साँझ इन्टरनेटमा समस्या देखिएको छ । सबैजसो इन्टरनेट सेवाप्रदायक र टेलिकम कम्पनीको इन्टरनेटमा समस्या देखिएको हो ।

नेपाल टेलिकमका प्रवक्ता हरि ढकालले इन्टरनेटमा केही समस्या आएको बताए । उनका अनुसार भारतबाट आयात गरिएको ब्यान्डविथमा नै समस्या देखिएको हो । भारतीय इन्टरनेट सेवाप्रदायक एयरटेलबाट खरिद एवं आयात गरिएको इन्टरनेटमा समस्या आएको आशंका गरिएको छ ।

नेपाल इन्टरनेट सेवा प्रदायक संघ (आइस्पान)ले पनि इन्टरनेट सेवा डाउन भएको पुष्टि गरेको छ ।

"एयरटोलको नेटवर्क लगभग पूर्णरूपमा डाउन भएको छ," आइस्पान सीईओ सुभास खड्काले भने ।

लामो समयदेखि नेपालका इन्टरनेट कम्पनीले ब्यान्डविथको भुक्तानी गर्न नसकेको कारणले काट्यो की अन्य कारणले हो भन्ने स्पष्ट छैन । तर नेपाल टेलिकमको नेटवर्कमा समेत समस्या आएको छ ।

उनले अहिले कन्ट्रयाक्ट भ्यालिड नहुँदा एयरटेलसँग औपचारिक कुरा गर्ने बाटो नरहेको बताए ।

नेपालको कुल इन्टरनेटमा एयरटेलको हिस्सा करिब ८५ प्रतिशत रहेको आइस्पानले जनाएको छ ।