काठमाडौं । प्रधानमन्त्री कप राष्ट्रिय महिला क्रिकेट प्रतियोगितामा अपराजित एपीएफले सुपर–४ मा सहज जित निकालेको छ । विभागीय टोली एपीएफले बिहीबार धनगढीस्थित फाप्ला क्रिकेट मैदानमा सम्पन्न खेलमा वाग्मती प्रदेशविरुद्ध १० विकेटको जित निकालेको हो । 

खेलमा वाग्मतीले प्रस्तुत गरेको ४३ रनको सामान्य लक्ष्य एपीएफले ६.५ ओभरमा विकेट नगुमाई पूरा गर्‍यो । 

एपीएफको जितमा ओपनरद्वय मम्ता चौधरी र राजमती ऐरीले क्रमशः २३ र १४ रन बनाइन् । 

त्यसअघि टस हारेर ब्याटिङमा आएको वाग्मतीले निर्धारित १८ ओभरमा आठ विकेट गुमाएर ४२ रनको योगफल खडा गरेको थियो । प्रतिकूल मौसमका कारण खेल निर्धारित समयमा सुरु हुन नसक्दा ओभर घटाइएको थियो ।

एपीएफविरुद्ध वाग्मतीका कुनै पनि ब्याटर दोहोरो अंकसम्म पुग्न सकेनन् । वाग्मतीकी सविका यादव र यसु पाण्डेले समान सर्वाधिक आठ रन बनाइन् । 

वाग्मतीविरुद्ध एपीएफकी सुमन विष्टले तीन विकेट लिइन् । तीन ओभर बलिङ गरेकी सुमनले एक मेडन राख्दै ६ रनमात्र खर्चिइन् । यसबाहेक, विनु बुढा र रेखा रावलले समान दुई विकेट लिइन् । कविता जोशीको नाममा एक विकेट रह्यो ।

प्रतियोगितामा एपीएफ समूह ‘ए’को शीर्ष स्थानमा रहँदै सुपर–४ मा आएको हो । यस्तै, वाग्मती भने समूह ‘बी’को दोस्रो स्थानमा रहँदै अन्तिम चारमा प्रवेश गरेको हो ।