काठमाडौं । जनमत पार्टीका अध्यक्ष डा.चन्द्रकान्त राउतले देशमा दुईदलीय व्यवस्था लाद्ने षड्यन्त्र भइरहेको बताएका छन् ।

बिहीवार काठमाडौंमा गजेन्द्रनारायण सिंहको २४औँ पुण्यतिथिको अवसरमा आयोजित कार्यक्रमपछि सञ्चारकर्मीहरूसँग कुरा गर्दै उनले सरकारका पछिल्ला केही निर्णयहरूले दुईदलीय व्यवस्था लाद्ने षड्यन्त्र भइरहेको महशुस गरेको उल्लेख गरे ।

उनले मधेसवादी दलहरू अब एकत्रित हुने ठूलो सम्भावना रहेको पनि बताए । दुईवटा विपरीत धारका दलहरू मिलेर सरकार बनाउने कुरा लोकतान्त्रिक देशमा बिरलै हुने उनको भनाइ थियो । एमाले–कांग्रेसबाहेक अरु सबै दलहरू मिलेर सडकमा आउने सम्भावना रहेको उनले बताए ।

"मधेसवादी दलहरु एकत्रित हुने ठूलो सम्भवाना छ । किनभने दुईवटा ठूला दल आपसमा मिलेर सरकार बनाएका छन् । जुनकुरा लोकतान्त्रिक देशमा बिरलै हुने कुरा हो । दुईवटा विपरीत धारका दलहरू मिलेर सरकार बनाउने कुरा लोकतान्त्रिक देशमा हुँदैन । जुन किसिमको ऐनहरू अहिले संशोधन गर्न लागेका छन्, यसले के स्पष्ट हुन्छ भने यहाँ दुईदलीय व्यवस्था लाद्ने षड्यन्त्र हुँदैछ । मधेसकेन्द्रित दलहरू मात्रै होइन, ती दुई दलहरूबाहेक अरु सबै दलहरू मिलेर सडकमा आउने सम्भावना प्रवल देखेको छु," उनले भने ।

अध्यक्ष राउतले व्यवस्थामाथि नै खतरा आउने चिन्ता लागेको स्पष्ट पारे ।