काठमाडौं । चालु आर्थिक वर्ष २०८१/०८२ को ६ महिनामा वाणिज्य बैंकहरूको खराब कर्जा बढेको छ । गत आर्थिक वर्षको पुस मसान्तसम्मको तुलनामा चालु आर्थिक  वर्षमा खराब कर्जा ०.९४ प्रतिशत विन्दुले वृद्धि भएको हो ।

गत आर्थिका वर्षमा बैंकहरूको औसत खराब कर्जाको दर २.९१ प्रतिशत थियो । चालु आर्थिक वर्षको पुस मसान्तसम्ममा वाणिज्य बैंकहरूको खराब कर्जा ३.८५ प्रतिशत कायम भएको छ । बैंकहरूले धितो बिक्री सहज रूपमा गर्न नसक्दा खराब कर्जा बढेको देखिएको पूर्व बैंकर भुवन दाहाल बताउँछन् । उनका अनुसार अर्थतन्त्रमा देखिएको प्रत्येक्ष प्रभाव बैंकिङ क्षेत्रको ऋण असुलीमा पनि देखिएको हो ।

“धितो बिक्री कम हुँदा पनि बैंकहरूको खराब कर्जा बढेको हो,” दाहालले भने, “तर, यो लामो समयसम्म रहदैन रिकोभर बैंकले गर्छन् । अर्थतन्त्रमा देखिएको शिथिलताले पनि प्रभाव पारेको हो ।”

यो अवधिमा खराब कर्जा सबैभन्दा बढी कुमारी बैंकको छ । यो बैंकको खराब कर्जा ६.९६ प्रतिशत छ । त्यस्तै सबैभन्दा कम खराब कर्जा एभरेष्ट बैंकको छ । यो बैंकको खराब कर्जा ०.६६ प्रतिशत छ ।

तर, राष्ट्रिय वाणिज्य बैंकको खराब कर्जा गत वर्षको पुसको तुलनामा २.०२ प्रतिशत विन्दुले बढेको छ ।

बैंकहरूको खराब कर्जा बढ्दै जाँदा प्रोभिजन पनि बढ्दै गएको छ । बैंकहरूले गर्ने प्रोभिजन र खराब कर्जालाई एउटै रूपमा हेर्न नहुँने पूर्व बैंकर अनलराज भट्टराई बताउँछन् । आज नेपाल आर्थिक पत्रकार संघ (नाफिज)ले आयोजना गरेको एक कार्यक्रम भट्टराईले राष्ट्र बैंकको नीतिका कारणले गर्दा पनि प्रोभिजन बढेको बताए । “एनपीए र प्रोभिजन भनेको फरक कुरा हो । यसलाई छुट्याउने छुट्टै कानुन चाहिन्छ, एउटै डालोमा हाल्न मिल्दैन,” उनले भने, “धितो राखेर ऋण प्रवाह गरेका बैंकहरूले पुनः सतप्रतिसत प्रोभिजन गर्नुपर्ने नियम गलत छ । यसलाई सच्याउनुपर्छ ।”

बैंकहरू पनि स्वनियमनमा बस्नुपर्ने र आफ्नो ऋणको वर्गीकरण आफैले इमान्दारिताका साथ गर्नुपर्ने भट्टराई बताउँछन् ।