काठमाडौं । नेपालले युक्रेनको पक्षमा मतदान गरेको छ । संयुक्त राष्ट्रसंघमा ‘युक्रेनी भूभागबाट रुस तत्काल फिर्ता हुनुपर्छ’ भन्ने प्रस्तावमाथि भएको मतदानमा नेपाल युक्रनको पक्षमा उभिएको हो ।

सोमबार राष्ट्रसंघमा भएको मतदानमा नेपालले रुस तत्काल युक्रेनी भूभागबाट फिर्ता हुनुपर्ने पक्षमा मतदान गरेको हो ।

रुसले युक्रेनमाथि आक्रमण गरेको तीन वर्ष पूरा भएको सन्दर्भमा राष्ट्रसंघमा भएको मतदानमा प्रस्तावको पक्षमा ९३ र विपक्षमा १८ राष्ट्रले मतदान गरे । यस्तै, ६५ देश मतदानमा भाग नलिई तटस्थ बसे ।

बहुमत सदस्यले ‘युक्रेनी भूभागबाट रुस तत्काल फिर्ता हुनुपर्ने’ प्रस्तावको पक्षमा मतदान गरेका कारण प्रस्ताव अनुमोदन भएको छ ।

अमेरिका, इजरायल, हंगरीलगायत देश प्रस्तावको विपक्षमा अर्थात् रुसको पक्षमा उभिएका थिए । रुसले यस प्रस्तावको विपक्षमा मतदान गरेको थियो । प्रस्तावलाई समर्थन गर्नेहरूमा जर्मनी, बेलायत, फ्रान्स लगायत राष्ट्र थिए । संयुक्त राष्ट्र संघमा यस प्रस्तावमाथि भएको मतदानमा भारत र चीनले भाग लिएनन् ।