त्रिवेणी (रूकुम पश्चिम) । रुकुम पश्चिमको आठबीसकोट नगरपालिकामा रूखले च्यापिएर एकजनाको मृत्यु भएको छ भने एकजना घाइते भएका छन् ।

घर निर्माणमा प्रयोग हुने रुख काट्न गएको बेला रुखले च्यापेर आज आठबीसकोट–१०, झिन्चौरका ५१ वर्षीय वीरबहादुर शाहीको मृत्यु भएको वडाध्यक्ष गणेशकुमार शाहले जानकारी दिए । शाहीको घटनास्थलमै मृत्यु भएको हो ।

वडाअध्यक्ष शाहका अनुसार सोही वडाका ३५ वर्षीय प्रेमराज कुसारी घाइते छिन् । घाइतेको आठबीसकोट नगर अस्पतालमा उपचार भइरहेको जानकारी दिए । कुसारी र शाही विद्युतीय रुख काट्ने उपकरण (आरा मेसिन) प्रयोग गरेर घरमा प्रयोग हुने दार बनाउन जंगल गएका थिए । रासस