काठमाडौं । अर्थतन्त्रलाई चलायमान बनाउन सहयोगी भूमिका खेल्ने एउटा क्षेत्र जग्गाको कारोबार बढ्न थालेको छ । गत आर्थिक वर्ष २०८०/०८१ को मंसिर–पुस र चालु आर्थिक वर्ष २०८१/०८२ को सोही अवधिलाई तुलनामा गर्दा जग्गाको कारोबार बढ्न थालेको हो । यसका साथै यही आर्थिक वर्षको मंसिरको तुलनामा पुसमा जग्गाको कारोबार बढेको छ ।

जग्गाको कारोबार बढ्न थालेसँगै कारोबारीहरू पनि उत्साहित हुन थालेका छन् । घरजग्गाको कारोबार नबढ्दा बैंकरदेखि घरजग्गा कारोबारीहरू चिन्तित थिए । पछिल्ला दिनमा जग्गाको कारोबार बढ्न थालेसँगै निरन्तरता पाउनेमा व्यवसायीहरू आशावादी देखिन्छन् । 

गत वर्षको तुलनासँगै चालु आर्थिक वर्षको मंसिरमा भन्दा पुसमा पनि जग्गाको कारोबार बढेको छ । भूमि व्यवस्थापन तथा अभिलेख विभागका अनुसार चालु आर्थिक वर्षको पुसमा एक लाख ४० हजार ६२१ कित्ता जग्गाको कारोबार भएको छ । चालु आर्थिक वर्षकै मंसिरमा एक लाख २८ हजार ३८२ कित्ताको कारोबार भएको थियो ।

जग्गाको कारोबार बढेसँगै राजस्व संकलनमा वृद्धि भएको छ । जग्गाको कारोबारबाट मंसिरमा तीन अर्ब ८७ करोड ४८ लाख रुपैयाँ राजस्व संकलन भएकोमा पुसमा चार अर्ब २५ करोड २२ लाख रुपैयाँ राजस्व संकलन भएको छ । मंसिरको तुलनामा पुसमा राजस्व संकलन ३७ करोड ७३ लाख रुपैयाँले बढेको हो ।

गत आर्थिक वर्षको मंसिर र पुसको तुलनमा यो आर्थिक वर्षको मंसिर र पुसमा राजस्व संकलन तथा कारोबार कित्ता बाढेको हो । गत आर्थिक वर्षको पुसमा एक लाख ३६ हजार ७७० कित्ता जग्गा कारोकार भएको थियो । त्यस्तै मंसिरमा एक लाख २७ हजार ६३९ कित्ता कारोबार भएको थियो ।

घरजग्गाको कारोबार बढ्दै गएपछि सन्तुष्ट हुने ठाउँ नरहेको नेपाल जग्गा तथा आवास विकास महासंघका निवर्तमान अध्यक्ष भेषराज लोहनी बताउँछन् । बैंकहरूले ब्याजदर घटाउँदै लगेपछि त्यसको फाइदा उगाउन जग्गामा पैसा लगानी गर्ने बढेको उनी बताउँछन् ।

जग्गाको कारोबार पहिलेको तुलनामा अहिले केही मात्रामा बढेको नेपाल जग्गा तथा आवास विकास महासंघका महासचिव रोशन भोयद्योले बताए । तर, अझै पनि समस्या समाधान भएर सुधारै भइसकेको भन्ने स्थिति नरहेको भोयद्यो बताउँछन् ।