काठमाडौं । राष्ट्रिय महिला लिगको दोस्रो चरणमा सर्लाहीको वाग्मती नगरपालिकाविरुद्ध विभागीय टोली एपीएफ क्लबले ६–० को सहज जित निकालेको छ ।

बुधबार सातदोबाटोस्थित एन्फा मुख्यालयमा भएको खेलमा एपीएफलाई जित दिलाउन रश्मीकुमारी घिसिङ र सरु लिम्बूले समान दुई गोल गरे । यस्तै, प्रीति राईले एक गोल थप्दा एपीएफले अर्को एक गोल भने आत्मघाती उपहार पाएको थियो ।

खेलको ४३औँ मिनेटमा रश्मीले गोल गर्दै एपीएफलाई अग्रतामा राखेकी थिइन् । पहिलो हाफको इन्जुरी समयमा रश्मीले नै एपीएफको अग्रता दोब्बर बनाइन् । ५५औँ मिनेटमा वाग्मतीकी सेमिहाङ्मा लिम्बुबाट आत्मघाती गोल भएपछि एपीएफले अग्रतालाई ३–० मा पुर्‍याएको थियो । त्यसको अर्को मिनेटमा नै सरुले गोल गर्दै एपीएफको अग्रतालाई ४–० मा पुर्‍याइन् ।

यस्तै, निर्धारित समय समाप्त हुन दुई मिनेट बाँकी हुँदा प्रीतिले गोल गर्दै एपीएफको अग्रतालाई ५–० मा राखिन् । इन्जुरी समयमा सरुले व्यक्तिगत दोस्रो गोल गरेपछि एपीएफले ६–० को जित पक्का गरेको हो ।

प्रतियोगिताको दोस्रो चरणमा अपराजित एपीएफको यो लगातार पाँचौँ जित हो । पाँच खेलबाट १५ अंक जोडेको एपीएफ तालिकाको शीर्ष स्थानमा छ ।