काठमाडौं । विपद् जोखिम न्यूनीकरण तथा व्यवस्थापन राष्ट्रिय प्राधिकरणले विपद्पश्चात्‌काे पुनर्निर्माण तथा पुनर्स्थापनाका लागि योजना स्वीकृत भएसँगै लाभग्राहीसँग सम्झौता प्रक्रिया अघि बढ्ने जनाएको छ ।

सोमबार सिंहदरबारमा पत्रकार सम्मेलन गर्दै प्राधिकरणले आइतबार बसेको विपद् राष्ट्रिय परिषद्को १६औँ बैठकले भूकम्प र मनसुनजन्य विपद्पश्चात्‌काे पुनर्निर्माण तथा पुनर्स्थापनाका लागि योजना स्वीकृत गरेको जानकारी दिँदै अब आगामी माघ २ गतेदेखि लाभग्राहीसँग सम्झौता प्रक्रिया प्रारम्भ गरी पुनर्निर्माण थालनी हुने जनाएको हो । 

प्राधिकरणका सहसचिव डा‍. भीष्मकुमार भुसालले विपद्बाट भएको क्षतिको विस्तृत आकलन नभएका क्षेत्रमा माघ २ गतेदेखि क्षतिको विवरण संकलन हुने बताए । 

लाभग्राहीसँग सम्झौता भएसँगै पहिलो किस्तामा ५० हजार उपलव्ध गराउने र तीन किस्तामा पूर्णता दिइने भुसालले जानकारी दिए । उनले स्थानीयस्तरमा नै इन्जिनियर खटाउने र पुनर्निर्माणमा प्रयोग हुने सामाग्रीको गुणस्तर कायम गरिने बताए । 

उनले पुनर्निर्माण र पुनःस्थानाका लागि प्राधिकरणको समन्वयमा साझेदार संस्थाको सहकार्यमा कार्यक्रम सञ्चालन गर्ने र स्थानीयलाई पनि परिचालन गरिने उल्लेख गरे ।