काठमाडौं । परराष्ट्रमन्त्री आरजु राणा देउवाले चीनले पोखरा क्षेत्रीय अन्तर्राष्ट्रिय विमानस्थल सञ्चालनमा सहयोग गर्ने प्रतिबद्धता जनाएको बताएकी छन् । प्रतिनिधिसभाअन्तर्गतको अन्तर्राष्ट्रिय सम्बन्ध र पर्यटन समितिको सोमबारको बैठकमा उनले यस्तो खुलासा गरेकी हुन् ।

“केही दिनअघि मैले चीन भ्रमण गर्दा चीनका विदेशमन्त्री वाङ यीले मलाई भन्नुभयो– तपाईंहरूलाई पोखरा विमानस्थल सञ्चालन गर्न हामी सघाउनेछौँ र यो सम्भव छ ।”

प्रधानमन्त्री केपी शर्मा ओलीले गएको मंसिर १७ देखि २० गतेसम्म चीनको औपचारिक भ्रमण गरेका थिए । प्रधानमन्त्री चीन जानुअघि परराष्ट्रमन्त्री राणाले चीनको भ्रमण गरेकी थिइन् । त्यसपछि फर्केर उनी प्रधानमन्त्रीसँगै पुनः चीन गएकी थिइन् ।

प्रधानमन्त्री ओलीको भ्रमणको तयारीस्वरूप आफू चीन जाँदा चिनियाँ विदेशमन्त्रीले पोखरा विमानस्थल सञ्चालनमा सघाउने प्रतिबद्धता जनाएको उनले बताइन् ।

सन् २०२५ लाई ‘भिजिट नेपाल इयर इन चाइना’ भनेर मनाइँदै छ । यो कार्यक्रमअन्तर्गत यो वर्ष चीनले आफ्ना नागरिकलाई नेपाल घुम्न पठाउनेछ ।

“पोखराकेन्द्रित भएर धेरै कार्यक्रम चीनले गर्न खोजेको छ,” उनले भनिन् । पोखरा विमानस्थल सञ्चालनमा सघाउन पनि यस्तो गर्न खोजिएको उनको बुझाइ छ ।

प्रधानमन्त्री ओलीले चीन भ्रमण गर्दा पोखरा विमानस्थल एजेन्डामा नै नरहेको उनले स्पष्ट पारिन् । “पोखरा विमानस्थल निर्माण गर्दाको चिनियाँ ऋणलाई अनुदानमा लैजान प्रस्ताव गएको छैन,” परराष्ट्रमन्त्री राणाले भनिन् ।