काठमाडौं । जय ट्रफी पुरुष इलाइट कपको पाँचौँ खेलमा विभागीय टोली त्रिभुवन आर्मी क्लबविरुद्ध पहिलो दिन मधेस प्रदेश ‘फलोअन’मा १२१ रनले पछि परेको छ ।

शनिबार पर्साको वीरगन्जस्थित नारायणी क्रिकेट मैदानमा आर्मीले इनिङ समाप्तिको घोषणा गर्नुअघि नौ विकेट गुमाएर २२५ रन बनाएको थियो । जवाफी ब्याटिङमा उत्रिएको मधेसले पहिलो इनिङमा १०२ रन मात्र बनाउन सक्यो । त्यसपछि आर्मीबाट फलोअन पाएको मधेसले एक ओभरमा दुई रन बनाउँदा अम्पायरले दिनको अन्त्य गरे ।

पहिलो इनिङमा आर्मीका दुई ब्याटरले अर्धशतक बनाए । बसिर अहमेद र भीम सार्कीले क्रमशः ६७ रन ५२ रनको योगदान गरे । इम्रान शेखले ४२ रन थपे । अरू खेलाडीले दोहोरो अंकमा रन जोड्न सकेनन् । आर्मीले पहिलो इनिङमा २९ अतिरिक्त रन पाएको थियो ।

आर्मीविरुद्ध मधेसका रञ्जीत कुमारले पाँच विकेट लिए । १६.३ ओभर बलिङ गरेका रञ्जीतले तीन मेडन फ्याँक्दै पाँच विकेट लिएका हुन् । प्रदीप पासवानले दुई र अभिषेक तिवारी र हरिशंकर साहले समान एक विकेट लिए ।

पहिलो इनिङमा मधेसका कप्तान हरिशंकर साहले सर्वाधिक ३१ रन बनाए । अभिषेक तिवारीले १३, मयन यादवले ११ र प्रदीप पासवानले १० रन थपे ।

मधेसलाई सस्तैमा समेट्न आर्मीका साहब आलमले ६ विकेट लिए । साहबले १२ ओभरमा पाँच मेडन फ्याँक्दै ३७ रन खर्चिए । सोमपाल कामी, आकाश चन्द, बसिर अहमेद र पवन कार्कीले समान एक विकेट लिए । 

दोस्रो इनिङमा मधेसबाट हाल हिमांशु दत्त दुई रन र मयन यादव शून्यमा छन् ।

प्रतियोगितामा दुवै टोली पहिलो जितको खोजीमा छन् । पहिलो खेलमा मधेस र वाग्मती प्रदेशले ‘ड्र’ खेलेका थिए । मधेसले दोस्रो खेलमा नेपाल पुलिससँग एक इनिङ र ३५ रनको हार व्यहोरेको थियो । आर्मीले यसअघि पुलिस र वाग्मतीसँग ‘ड्र’ खेलेको थियो ।