काठमाडौं । चौथो डिभिजनको एक्रिंगटन स्टेनली एफसीविरुद्ध ४–० को सहज जित निकाल्दै प्रिमियर लिग लिडर लिभरपुल एफए कपको चौथो चरणमा प्रवेश गरेको छ ।

शनिबार घरेलु मैदान एनफिल्डमा लिभरपुललाई जित दिलाउन डिएगो जोटा, ट्रेन्ट एलेक्सनेन्ड आर्नोल्ड, जेडन डान्स र फेडेरिको चेइसाले गोल गरे । लिभरपुलले पहिलो र दोस्रो हाफमा समान दुई गोल गरेको हो ।

खेलको २९औँ मिनेटमा जोटाको गोलमार्फत लिभरपुलले अग्रता लिएको थियो । ४५औँ मिनेटमा आर्नोल्डले टोलीको अग्रता दोब्बर बनाए । डान्सले ७६औँ मिनेटमा लिभरपुलका निम्ति तेस्रो गोल गरे । निर्धारित समयको अन्तिम मिनेटमा चेइसाले गोल गर्दै टोलीलाई ४–० को सहज जित दिलाए ।

जितसँगै चौथो चरणको यात्रा तय गरे पनि लिभरपुलको प्रतिद्वन्द्वी निश्चित भइसकेको छैन । प्रिमियर लिगमा भने शीर्ष स्थानमा आसीन लिभरपुलले १९ खेलबाट ४६ अंक जोडेको छ ।