काठमाडौं । राष्ट्रिय महिला लिगको दोस्रो चरणमा सशस्त्र प्रहरी बलको एपीएफ क्लबले अर्को विभागीय टोली नेपाल पुलिस क्लबविरुद्ध ६–० को फराकिलो जित निकालेको छ ।

बिहीबार सातदोबाटोस्थित एन्फा मुख्यालयमा सम्पन्न विभागीय डर्बीमा एपीएफलाई जित दिलाउन अनिता बस्नेतले ह्याट्रिक गरिन् । यस्तै, सरु लिम्बूले दुई र रेनुका नगरकोटेले एक गोल थपे ।

एपीएफले पहिलो हाफमा दुई र दोस्रो हाफमा चार गोल थपेको हो । खेलको १०औँ मिनेटमा अनिताले गोल गर्दै एपीएफलाई अग्रतामा राखेकी थिइन् । ३७औँ मिनेटमा रेनुकाले गोल गरेपछि एपीएफले पहिलो हाफमा २–० को अग्रता बनाएको थियो ।

यसपछि पुलिसले अन्तिम १० मिनेट र इन्जुरी समयमा गरी चार गोल थप्यो । ८५औँ मिनेटमा सरुले एपीएफको अग्रतालाई ३–० मा पुर्‍याइन् । ८७औँ मिनेटमा सरुले नै एपीएफको अग्रतालाई ४–० मा राखिन् । यस्तै, इन्जुरी समयमा अनिताले दुई गोल गर्दै ह्याट्रिक पूरा गरेपछि एपीएफले पुलिसविरुद्ध फराकिलो जित निकालेको हो ।

जारी महिला लिगमा एपीएफ हालसम्म अपराजित छ । यता, पुलिसको भने दोस्रो चरणमा यो पहिलो हार हो ।