काठमाडौं । नेपाली महिला फुटबल टिमले यो वर्षको पहिलो फिफा विन्डोमा नै चारदेशीय अन्तर्राष्ट्रिय प्रतियोगिता खेल्ने भएको छ । अखिल नेपाल फुटबल संघ (एन्फा)ले बुधबार सामाजिक सञ्जालमार्फत नेपालले घरेलु मैदानमा चारदेशीय प्रतियोगिता आयोजना गर्न लागेको जनाएको छ ।

एन्फाका अनुसार, यो प्रतियोगितामा नेपालसँगै म्यानमार, कीर्गिस्तान र लेबनानले सहभागिता जनाउनेछन् । प्रतियोगिता फेब्रुअरी १७ देखि २६ सम्म अर्थात् फागुन ५ देखि १४ गतेसम्म सञ्चालन हुनेछ । प्रतियोगिताका सबै खेल त्रिपुरेश्वरस्थित दशरथ रंगशालामा खेलाइनेछ ।

सबैभन्दा बलियो म्यानमार, कुन टिम छ वरीयतामा कमजोर ?
चारदेशीय प्रतियोगिताका निम्ति नेपाल आउनेमध्येमा म्यानमार सबैभन्दा बलियो टिम हो । विश्व फुटबलको सर्वोच्च निकाय फिफाको वरीयतामा म्यानमार ५५औँ स्थानमा छ ।

नेपाली टिमले सन् २०१८ यता म्यानमारविरुद्ध चार खेल खेल्दा तीनमा हार व्यहोरेको छ । नेपाली महिला टिमले सन् २०१८ र २०१९ मा ओलिम्पक एसिया छनोटमा म्यानमारविरुद्ध प्रतिस्पर्धा गरेको थियो । २०१८ को नोभेम्बरमा भएको पहिलो चरणमा नेपालले म्यानमारलाई १–१ को बराबरीमा रोकेको थियो । २०१९ को अप्रिल ३ मा भएको दोस्रो चरणमा भने नेपाललाई म्यानमारले ३–१ ले हराएको थियो ।

यस्तै, नेपालले २०१९ मा भारतले आयोजना गरेको गोल्डकपमा म्यानमारविरुद्ध दुई खेल खेलेको थियो । प्रतियोगिताको पहिलो खेलमा म्यानमारले नेपाललाई ३–० ले हराएको थियो । प्रतियोगिताको फाइनलमा पनि म्यानमारले नेपाललाई ३–१ ले हराउँदै उपाधि जितेको थियो ।

फिफा वरीयताको १०३औँ स्थानमा रहेको नेपाल प्रतियोगिताको दोस्रो बलियो टिम हो । नेपालले पछिल्लोपटक सन् २०१९ मा कीर्गिस्तानविरुद्ध प्रतिस्पर्धा गरेको थियो । उक्त प्रतियोगितामा नेपालले घरेलु टिम कीर्गिस्तानविरुद्ध ८–२ को सहज जित निकालेको थियो । त्यो खेलमा नेपालकी सावित्रा भण्डारीले ६ गोल गरेकी थिइन् । उक्त प्रतियोगिताको पनि फाइनलसम्म पुगेको नेपालले उपाधि भिड्न्तमा उज्वेकिस्तानविरुद्ध ३–२ को हार व्यहोरेको थियो ।

चारदेशीय प्रतियोगिताका निम्ति नेपाल आउन लागेकामध्ये सबैभन्दा कमजोर फिफा वरीयता भएको टिम हो, लेबनान । फिफा वरीयतामा लेबनान १३४औँ स्थानमा छ ।

नेपाली महिला टिमले लेबनानविरुद्ध पनि प्रतिस्पर्धा गरिसकेको छ । नेपालले पछिल्लोपटक साउदी अरेबियामा भएको वाफ महिला च्याम्पियनसिपमा लेबनानविरुद्ध प्रतिस्पर्धा गरेको थियो । प्रतियोगिताको सेमिफाइनल खेलमा नेपालले लेबनानविरुद्ध २–१ को जित निकाल्दै फाइनल यात्रा तय गरेको थियो । उक्त प्रतियोगितामा पनि नेपाल उपविजेतामै सीमित बन्यो । प्रतियोगिताको फाइनलमा नेपाललाई पेनाल्टी सुटआउटमा ५–३ ले हराउँदै जोर्डनले उपाधि जितेको थियो ।