काठमाडौं । नेकपा (एमाले)बाट निष्कासित भीम रावल र नेपाली कांग्रेसबाट तीन वर्षअघि निष्कासित कर्ण मल्लबीच भेटवार्ता भएको छ । सोमबार भएको भेटवार्तामा राजनीतिकरूपमा नयाँ समझदारी निर्माण गरेर जाने विषयमा छलफल भएको मल्लले जानकारी दिए ।

“उहाँ सुदूरपश्चिमको मान्छे, राष्ट्रियस्तरको नेता । मलाई तीन वर्षअघि शेरबहादुर देउवाले निकालेको, उहाँलाई केही दिनअघि केपी ओलीले निष्कासित गरेको,” मल्लले बाह्रखरीसँग भने, “न उहाँ बीपी कांग्रेसमा आउने कुरा भएको हो, न मिलेर नयाँ पार्टी खोल्ने सहमति बनेको हो ।” 

उनले आफूले व्यक्तिगत, सामाजिक, भौगोलिक र राजनीतिकरूपमा पनि भेट्न उपयुक्त लागिर भेट्न गएको बताए । अगाडिको राजनीतिबारे नेता रावलले पत्रकार सम्मेलनमा बताउने उनको भनाइ छ ।

“राजनीतिकरूपमा पनि जान सकिन्छ कि भन्ने विषयमा पनि हामी दाजुभाइको भेटमा छलफल भएको हो । त्यो छलफल सकारात्मक ढंगले प्रारम्भ भएको छ,” मल्लले भने, “बाँकी कुरा भोलि पर्सि उहाँले पत्रकार सम्मेलन राख्दै हुनुहुन्छ, बाँकी कुरा तपाईंहरूले थाहा पाइहाल्नुहुनेछ ।”

मल्लले ‘नेपाल र नेपालीको स्वाभिमान, नयाँ ढंगले सुरु गरौँ कि अभियान...?’ भनेर फेसबुक वालमा भेटपछिको फोटो सार्वजनिक गरेका छन् ।

रावल र कर्णसँगै भेटमा सुदूरपश्चिम प्रदेशका सांसद तारा जोशी पनि सहभागी थिए ।

तत्कालीन अवस्थामा मल्ल डडेलधुरा जिल्ला सभापति थिए । देउवाले उनलाई जिल्ला अधिवेशनमा सहभागी नगराएर महाधिवेशनबाट वञ्चित गरेका थिए । देउवाले ०७९ वैशाखमा स्थानीय चुनावका लागि अर्को पार्टीका उमेदवार उचालेको आरोप लगाएर पार्टीबाट निष्कासित गरेका थिए । त्यसयता उनी नेपाली कांग्रेस बीपी पार्टीको उपसभापतिका रूपमा सक्रिय छन् ।