काठमाडौं । घरजग्गा व्यवसायी विक्रम लामामाथि आक्रमण घटनामा गण्डकी प्रदेशका तत्कालीन सांसद तथा पूर्वमन्त्री राजीव गुरुङ (दीपक मनाङे)का सहयोगी नै पक्राउ परेपछि अनुसन्धानले अर्को मोड लिएको छ । विक्रममाथिको घटना ज्यान मार्ने उद्देश्य र आपराधिक समूहले सुपारी दिएर गराएको निष्कर्ष निकालेको प्रहरीले शनिबार मनाङेका सहयोगी टीका भण्डारीलाई पक्राउ गरेको हो ।

यसअघि, प्रहरीले विक्रममाथि आक्रमण गर्ने नुवाकोटका मार्सस भनिने शैलेन्द्र तामाङ र गोरखाका २९ वर्षीय निश्चल सुनुवारलाई पक्राउ गरेको थियो । विक्रममाथि आक्रमण घटनालाई प्रहरीले संगठित अपराध मुद्दामा अनुसन्धान थालेको छ । घटना घटेको करिब दुई महिनापछि भण्डारी पक्राउ परेका हुन् ।

नुवाकोटका विक्रममाथि कात्तिक ११ गते उनको अफिस नजिकै लाजिम्पाटस्थित इनोभा अस्पतालको पार्किङमा अन्धाधुन्ध रड प्रहार गरिएको थियो । घटनामा प्रत्यक्ष संलग्न शैलेन्द्र र निश्चलबाहेक अझै दुईजना फरार छन् ।

पक्राउ परेकाहरूको बयानका अधारमा विक्रममाथि ज्यान मार्ने उद्देश्यले नै आक्रमण भएको खुलेको हो । प्रहरीको अनुसन्धानका क्रममा अजय तामाङको योजनाअनुसार पक्राउ परेका निश्चल र शैलेन्द्र तामाङसहित अर्का फरार आरोपित दीपक बरामुले आक्रमण गरेको खुलेको हो ।

लामो सयमदेखि घरजग्गा व्यवसाय गर्दै आएका विक्रममाथि गाडी पार्किङ गरेर झरेलगत्तै अजय लामासहित चार जनाको समूहले आक्रमण गरेका थिए । आक्रमण गर्ने समूह र विक्रमबीच कुनै दुस्मनी नभएको प्रहरीको अनुसन्धानबाट खुलेको छ ।

उनीहरूले समेत सुपारी लिएर विक्रममाथि आक्रमण गरेको निष्कर्ष प्रहरीले निकालेको छ । अजय लामा समूहको आक्रमणमा परेको विक्रमको टाउकोमा गम्भीर चोट लागेको थियो । करिब एक महिना चक्रपथस्थित ग्रिन सिटी अस्पतालमा भर्ना भएका विक्रम हाल डिस्चार्ज भएका छन् ।

प्रहरीले फरार अजय र दीपकको खोजी तीव्र पारिएको जनाएको छ । उनीहरू भारत भागेको आशंका प्रहरीले गरेको छ । अजयले तीन साथीलाई प्रलोभनमा पारेर विक्रममाथि आक्रमण गर्न लगाएको प्रहरीको अनुसन्धानमा देखिएको छ ।

लक्ष्मी राईको योजनामा आक्रमण !

प्रहरीको अनुसन्धानका क्रममा विक्रम लामाकै दाइ दीपेश लामासँग सम्बन्धविच्छेद भएकी लक्ष्मी राईको योजनामा विक्रममाथि आक्रमण भएको खुलेको छ । हाल लक्ष्मी लन्डन गइसकेकी छन् ।

प्रारम्भिक अनुसन्धानमा नेपाल र लन्डनको समेत पासपोर्ट प्रयोग गर्ने लक्ष्मीकै योजनामा विक्रममाथि आक्रमण भएको देखिएको काठमाडौं प्रहरीले जनाएको छ ।

शनिबार पक्राउ परेका टीका भण्डारी र लक्ष्मीको पटक–पटक सम्पर्क देखिएपछि उनी पक्राउ परेका हुन् । प्रहरीको प्रारम्भिक बयानमा टीका भण्डारीले आक्रमणमा आफू संलग्न नरहेको बताएका छन् ।  

अनुसन्धानमा खटिएका प्रहरी अधिकारीसँग टीकाले भनेका छन्, ‘‘लक्ष्मी राईलाई मैले दिदी बनाएको छु । त्यसैको आधारमा सम्पर्क भएको हो । विक्रममाथि भएको घटनामा मेरो संलग्नता छैन् ।’’

विक्रममाथि आक्रमण भएको दोस्रो दिनमा लक्ष्मी लन्डन उडेका थिइन् । उनलाई समेत पक्राउ गरेर अनुसन्धान गर्न जिल्ला अदालत काठमाडौंले पक्राउ पुर्जी जारी गरिसकेको छ । तर, लन्डन भएका कारण उनी जोगिएका छन् ।

विक्रम घाइते भएर अस्पताल भर्ना भएका बेला समेत टीका आफैँ विक्रमलाई भेट्न अस्पताल पुगेका थिए । उनले त्यहीबेला घटनामा लक्ष्मीको योजना अनुसार नै भएको र आफूविरुद्ध उजुरी नदिन अनुरोध गरेका थिए । टीकाबाहेक दीपक मनाङेसमेत विक्रमलाई भेट्न पुगेका थिए ।

मनाङेले भने घटनामा आफ्ना सहयोगीको भूमिकासमेत शंकास्पद देखिए कानुनी दायरामा ल्याउन सुझाएका थिए । प्रहरीको अनुसन्धानका क्रममा कुटपिट गर्ने चार युवासँग विक्रमको कुनै रिसइबी नदेखिएपछि सुपारी दिएर आक्रमण भएको खुलेको थियो ।

हाल प्रहरीको थुनामा रहेका निश्चल र शैलेन्द्र दुवैले आफूहरूलाई घटनाबारे धेरै जानकारी नरहेको र सुपारीको विषयमा अजयलाई मात्रै थाहा भएको बयान दिएका छन् । प्रहरीको अनुसन्धानका क्रममा अजय र लक्ष्मीको समेत कनेक्सन देखिएको छ ।

लक्ष्मीले अजयलाई विक्रममाथि आक्रमण गर्न सुपारी दिएको आंशका गरेको छ । प्रहरीको अनुसन्धानका क्रममा लक्ष्मीले दीपेशसँग सम्बन्धविच्छेद हुनुको कारण विक्रम रहेको भन्दै अजयसहितका आपराधिक समूहलाई प्रयोग गरेको खुलेको छ । विक्रमका दाइ दीपेशसँग लन्डनमै विवाह गरेकी लक्ष्मी सुन व्यवसायी हुन् ।

प्रहरीका अनुसार, उनी नेपाल र लन्डन आवतजावत गर्ने गर्थिन् । तर, नेपाल आएका बेला लक्ष्मीको अन्य पुरुषसँगसमेत सम्बन्ध रहेको विक्रमले थाहा पाएपछि दाइ दीपेशलाई लक्ष्मीबारे जानकारी गराएका थिए ।

सोही कारण दीपेशले आफूलाई सम्बन्धविच्छेद गरेको प्रतिशोध लिन लक्ष्मीले आपराधिक समूहलाई सुपारी दिएका हुन् । लक्ष्मी राईले दीपेशसँग विवाह गर्नुअघि समेत सम्बन्धविच्छेद गरेको खुलेको छ ।

विक्रममाथि आक्रमण गर्नुअघि समेत फरार अजयसहितको समूहले लागुऔषध मुद्दामा फसाउने प्रयास गरेका थिए । त्यसका लागि उनीहरूले विक्रम लामाले पार्किङ गरेर राखेको गाडीभित्र लागुऔषध राख्ने र आफैँले प्रहरीलाई सूचना दिने योजना बनाएका थिए ।

पक्राउ परेका आरोपितले उक्त योजनाबारे प्रहरीलाई बयान दिएका छन् । त्योबाहेक विक्रम सुन तस्करीमा संलग्न रहेको गलत सूचना प्रहरीलाई दिएका थिए । प्रहरीले समेत गलत सूचनाकै आधारमा आफूलाई दु:ख दिएको विक्रमको गुनासो छ ।