काठमाडौं । नेपाल कम्युनिष्ट पार्टी (नेकपा)का महासचिव नेत्रविक्रम चन्द्र ‘विप्लव’ले सरकारले संसद्मा दर्ता भएको केही नेपाल ऐन (संशोधन) विधेयकको दफा ६४ फिर्ता लिने निर्णय गरेकोप्रति आक्रोश पोखेका छन् । १३२औँ माओ दिवसको अवसरमा सार्वजनिक नीति तथा रणनीतिक अध्ययन केन्द्र, नेपालले बिहीबार प्रज्ञा भवनमा आयोजना गरेको कार्यक्रममा आफूहरूले तीनबुँदे सहमति गर्न नभनेको बताए ।

“तीनबुँदे सहमति भयो । हामी आयौँ । हातपाउ जोडेर तीनबुँदे गर्नुस् बर्बाद भयौँ भन्दै आएको हामी ? खोज्दै को गएको ? सबै सहमति ठिक छ भन्दै आएको हो नि । अब तीनबुँदे लागु नगर्ने रे,” उनले भने ।

प्रतिनिधिसभाअन्तर्गतको कानुन, न्याय तथा मानवअधिकार समितिको आइतबारको बैठकमा कानुनमन्त्री अजयकुमार चौरसियाले विधेयकको दफा ६४ फिर्ता लिएको जानकारी दिएका थिए ।  तत्कालीन प्रधानमन्त्री केपी शर्मा ओली र चन्दबीच २०७७ फागुनमा तीनबुँदे सहमति भई प्रतिबन्धित नेकपा शान्तिपूर्ण राजनीतिमा आएको थियो । त्यसबेला भएको सहमतिमा नेता तथा कार्यकर्ताको रिहाइ र सम्पूर्ण मुद्दा फिर्ता लिने सहमति भएको थियो । सोही सहमतिबाट सरकार पछि हट्न लागेकोमा विप्लवले आक्रोश पोखेका हुन् ।

कार्यक्रममा विप्लवले मुद्दा फिर्ता नगरेर के गर्न खोज्या भन्दै प्रश्न गरे । “मुद्दा फिर्ता नगरेर के गर्न खोज्या ? फेरि रोमियो अप्रेसन ?, फेरि किलोसेरा टु ? रोमियो र किलासेरा टु भएपछि के जन्मिन्छ थाहा छ कि छैन ? त्यसले के जन्मायो ? त्यसबाट कोही तर्सनेवाला छैन,” उनले भने, “नेकपालाई दबाबमा राख्ने कल्पना छ भने छाडिदिए हुन्छ । त्यो सम्भव छैन । हामीले न्यायको लडाइँ लडेको हो । कसैको अघि भीख माग्न हिँडेको होइन ।” उनले भने ।

विप्लवले पार्टी एकता नगर्ने भन्ने सत्य नभएको बताए । माओवादी केन्द्रलाई आठ महिनाअघि नै एकताको प्रस्ताव पठाए पनि व्यवस्थित छलफल नगरेको गुनासो गरे । “नेकपा माओवादीलाई आठ महिनाअघि प्रस्ताव गर्यौँ । तर, माओवादीमा सुव्यवस्थित छलफल अहिले पनि छैन । त्यसपछि सबै छलफल सुन्यौँ, बेला भइसकेको छैन । त्यसैले समाजवादी सहकार्यका लागि हामी खुल्ला,” उनले भने ।