काठमाडौं । पोखराको सूर्यदर्शन सहकारी ठगी प्रकरणको मुद्दा अदालती प्रक्रियामा छ । पूर्वगृहमन्त्री तथा राष्ट्रिय स्वातन्त्र पार्टी (रास्वपा)का सभापति रवि लामिछाने नै मुछिएको मुद्दा कास्की अदालतमा पुगेको छ ।

प्रहरीले गरेको अनुसन्धान प्रतिवेदनका आधारमा जिल्ला सरकारी वकिल कार्यालय कास्कीले गत आइतबार सहकारी ठगी प्रकरणमा जोडिएका ४४ जनालाई अभियुक्त बनाएर मुद्दा दायर गरेको थियो ।

सहकारीको रकम अपचलन मुद्दामा अनुसन्धान थालिए पनि लामिछाने, पूर्वडीआईजी छविलाल जोशीसहित सहकारी ठगीका मुख्य आरोपित ओखलढुंगाका गितेन्द्रबाबु (जीबी) राईसहितका आरोपितमाथि सम्पत्ति शुद्धीकरण र संगठित अपराध मुद्दा दर्ता भयो ।

सम्पत्ति शुद्धीकरणमा मुद्दा दायर भएसँगै लामिछानेको सांसद पद निलम्बनमा परिसकेको छ । प्रतिवादीहरूबाट एक अर्ब ५१ करोड रुपैयाँ बिगो दाबी गरिएको छ ।

त्योबाहेक सम्पत्ति शुद्धीकरणको छुट्टै बिगो कायम छ । जीबी राईले पोखरासहित चितवन, बुटवल, काठमाडौं र पर्सामा सञ्चालन गरेको सहकारीमार्फत अर्बौं रुपैयाँ ठगी गरेकोबारे प्रहरीले अनुसन्धान तीव्र पारेको छ ।

पोखराबाहेक अन्य जिल्लाका प्रहरीलेसमेत अनुसन्धान प्रतिवेदन बुझाउने तयारी गरिरहेका छन् । यद्यपि, सहकारीका आरोपित जीबी राई अझै फरार छन् । उनीविरुद्ध प्रहरीको अन्तर्राष्ट्रिय अपराध संगठन इन्टरपोलले 'रेड नोटिस' नै जारी गरेको छ ।

उनको पासपोर्ट रद्दबारे प्रहरीले प्रक्रिया अघि बढाइसकेको छ । तर, जीबीकै बराबरीमा सहकारी ठगी गरेका अर्का आरोपित ललितपुरका भरत महर्जनको हकमा भने ठगी मुद्दामात्रै दर्ता भएको छ ।

महर्जन अध्यक्ष रहेको ललितपुरको पुल्चोकस्थित सुमेरु सेभिङ एन्ड क्रेडिट सहकारीले करिब ३५ हजार बचतकर्ताको १० अर्बभन्दा बढी रकम हिनामिना देखिएको थियो । तर, प्रहरीले बचतकर्ताबाहेक सञ्चालक समितिले नै महर्जनविरुद्ध उजुरी दिएका कारण प्रहरीले महर्जनबारे मात्रै अनुसन्धान गरेर अनुसन्धान प्रतिवेदन बुझाएको हो ।

सीआईबीको अनुसन्धान प्रतिवेदनको आधारमा जिल्ला सरकारी वकिल कार्यालयले पुस २ मा जिल्ला अदालत ललितपुरमा मुद्दा दर्ता गराएको छ ।

प्रहरीको केन्द्रीय अनुसन्धान ब्युरो (सीआईबी)ले महर्जनले तीन अर्ब ९३ करोड ४३ लाख रुपैयाँ अपचनल गरेको तथ्य खुलाउँदै अनुसन्धान प्रतिवेदन बुझाएको थियो । सोही आधारमा सरकारी वकिल कार्यालयले मुद्दा दायर गरेको छ ।

महर्जनले आठ निजी कम्पनी र तीन व्यक्तिका नाममा फर्जी ऋण खडा गरेर रकम अपचलन गरेको खुलेको हो । सहकारी डुबेपछि भागेर बेलायत पुगेका महर्जनलाई फिर्ता ल्याउन प्रहरीले अन्तर्राष्ट्रिय अपराध प्रहरी संगठन (इन्टरपोल) मा १९ माघ ०८० मा रेड नोटिस जारी गरेको थियो । तर, उनलाई फिर्ता ल्याउन सकेको छैन ।

सीआईबीका प्रवक्ता एसपी होविन्द्र बोगटीले सञ्चालक समितिबाट मात्रै उजुरी आएको र बचतकर्ताले उजुरी नदिएपछि उनलाई मात्रै ठगी मुद्दामा अनुसन्धान भएको बताए ।

मर्हजन २०५७ साउनदेखि २०७५ पुससम्म सहकारीमा कार्यकारी अध्यक्ष थिए । आश्चर्य त उही प्रकृतिको जीबी, रवि र छविमाथि सम्पत्ति शुद्धीकरण अनुसन्धान गरेको प्रहरीले महर्जनविरुद्ध भने ठगीमा मात्रै अनुसन्धान गरेको छ । जिल्ला सरकारी वकिल कार्यालयलेसमेत महर्जनविरुद्ध ठगी मुद्दामात्रै दर्ता गरेको छ ।

जसकारण महर्जनले तुलनात्मकरूपमा कानुनीरूपमा सहुलियत पाएका छन् । प्रहरीका अनुसार, महर्जनको सपरिवार नै एक वर्ष अघिदेखि नै लन्डन गइसकेको छ ।