काठमाडौं । क्रिस्मसको पूर्वसन्ध्यामा नासाको अन्तरिक्षयान 'पार्कर सोलार प्रोब' सूर्यको सबैभन्दा नजिकबाट जाँदै छ । नेपाली समयअनुसार अपराह्न ५:२५ बजे पार्कर सूर्यबाट ६१ लाख किलोमिटर मात्र टाढा हुनेछ । सूर्यको यति नजिक पुग्ने यो पहिलो मानव निर्मित वस्तु हुनेछ ।

न्युयोर्क टाइम्सका अनुसार, यो यान सूर्यतर्फ जानेवाला अघिल्लो कुनै पनि मिसनभन्दा सात गुणा नजिक छ । सूर्यको बाहिरी वायुमण्डलबाट जाँदा पार्करको गति ६.९ लाख किलोमिटर प्रतिघण्टाभन्दा बढी हुनेछ । यो मानवले बनाएको कुनै पनि वस्तुको अहिलेसम्मकै उच्च गति हो ।

पार्कर आगामी तीन दिनसम्म सूर्यको वायुमण्डलमा रहनेछ । पार्कर सोलार प्रोब हालसम्म २१ पटक सूर्यको फ्लाइबाइमार्फत सूर्यको सबैभन्दा नजिक पुगेको छ । यस क्षेत्रलाई पेरिहेलियन भनिन्छ । पार्करको तापक्रम सूर्यको नजिक जाँदा एकहजार डिग्री सेल्सियसभन्दा बढी हुनेछ ।

पार्करले डिसेम्बर २७ मा पृथ्वीमा आफ्नो यात्राबारे जानकारी पठाउनेछ ।

पार्कर सोलार प्रोब नासाले अगस्ट १२, २०१८ मा प्रक्षेपण गरेको थियो । यस मिसनबाट सूर्यको बाहिरी वायुमण्डललाई नजिकबाट अध्ययन गर्ने उद्देश्य राखिएको छ ।