काठमाडौं । ओपनर लहिरु मिलान्थाको उत्कृष्ट ब्याटिङप्रेरित जनकपुर बोल्ट्सले फाइनलमा सुदूरपश्चिम रोयल्सलाई पाँच विकेटले हराउँदै नेपाल प्रिमियर लिग (एनपीएल)को उपाधि जितेको छ ।

उपाधिसँगै जनकपुरले एक करोड १० लाख रुपैयाँ पुरस्कार पाउने भएको छ । उपविजेतामा चित्त बुझाएको सुदूरपश्चिम रोयल्सले ५१ लाख रुपैयाँ पुरस्कार पाउनेछ ।

शनिबार कीर्तिपुरस्थित त्रिवि क्रिकेट मैदानमा सुदूरपश्चिमले प्रस्तुत गरेको १८५ रनको लक्ष्य जनकपुरले १९.२ ओभरमा पाँच विकेट गुमाएर पूरा गर्‍यो ।

जनकपुरको जितमा ओपनर लहिरु मिलान्थाले उत्कृष्ट ब्याटिङ गर्दै सर्वाधिक ८७ रन बनाए । आक्रामक रूपमा ब्याटिङ गरेका उनले ४९ बलमा नौ चौका र चार छक्का प्रहार गरे ।

योसँगै मिलान्था प्रतियोगितामा सबैभन्दा धेरै रन बनाउने ब्याटर बने । उनले १० इनिङ्समा दुई अर्धशतकसहित २९३ रन बनाए । मिलान्थाले यसअघि प्रतियोगिताको उद्घाटन खेलमा विराटनगर किंग्सविरुद्ध अर्धशतक बनाएका थिए ।

फाइनलमा मिलान्थाले ११.१ ओभरमा जीवनदान पाएका थिए । दीपेन्द्रसिंह ऐरीले गरेको उक्त ओभरमा दीपेन्द्रले नै मिलान्थाको क्याच ‘मिस’ गरेका थिए ।

जनकपुरका ओपनरद्वय कप्तान आसिफ शेख र लहिरु मिलान्थाले उत्कृष्ट सुरुआत दिलाएका थिए । यी दुईले सात ओभरमा ७३ रन बनाएका थिए । 

सातौँ ओभरको अन्तिम बलमा आउट हुनुअघि आसिफले १९ बलमा चार चौका र दुई छक्कासहित ३३ रन जोडे । आसिफलाई सुदूरपश्चिमका सैब जैबले ब्रान्डन म्याकमुलमबाट क्याच गराए ।

७३–१ को स्थितिबाट दोस्रो विकेटका निम्ति मिलान्थाले मोहमद मोहसिनसँग ३२ रनको साझेदारी गरे । मोहसिन भने सस्तैमा आउट भए । १०औँ ओभरको अन्तिम बलमा इशान पाण्डेबाट बोल्ड हुनुअघि उनले आठ बलमा एक छक्कासहित नौ रन बनाए ।

१०५–२ को स्थितिबाट मिलान्थाले तेस्रो विकेटका निम्ति हर्ष थाकेरसँग ६१ रनको साझेदारी गर्दै जनकपुरलाई जितनजिक पुर्‍याएका थिए । अविजित रहेका हर्ष थाकेर र मयन यादवले क्रमशः ३० र दुई रन बनाए ।

दोस्रो क्वालिफायरमा यसअघि कर्णाली याक्सविरुद्ध ४५ रन बनाएका जिम्मी निसम भने सस्तैमा आउट भए । उनले चार रन मात्र बनाए । आकाश त्रिपाठी दुई रनमा रनआउट भए ।

सुदूरपश्चिमका कप्तान दीपेन्द्रसिंह ऐरी, स्कट कुग्गेलेन, सैब जैब र इशान पाण्डेले समान एक विकेट लिए ।

पहिलो इनिङ : ओपनरद्वयको शतकीय साझेदारी
त्यसअघि, टस जितेर ब्याटिङमा उत्रिएको सुदूरपश्चिमले निर्धारित २० ओभरमा नौ विकेट गुमाएर १८४ रन बनाएको थियो । सुदूरपश्चिमका ओपनिङ जोडी सैब जैब र विनोद भण्डारीले टिमलाई उत्कृष्ट सुरुआत दिलाए । यी दुईले पहिलो विकेटका निम्ति ११७ रनको शतकीय साझेदारी गरे ।

सैब जैबले ४३ बलमा ६९ रन बनाए । किशोर महतोले गरेको १२औँ ओभरको अन्तिम बलमा ललितनारायण राजवंशीबाट क्याच हुनुअघि जैबले आठ चौका र दुई छक्का प्रहार गरे ।

पहिलो विकेट गुमाएको दुई बलपछि नै सुदूरपश्चिमले अर्का ओपनर विनोदलाई पनि गुमायो । १३औँ ओभरको दोस्रो बलमा ललितले विनोदलाई बोल्ड गरे । विनोदले ४१ रन बनाए । उनले ३१ बलमा एक चौका र तीन छक्का प्रहार गरे ।

हर्मित सिंहले आठ बलमा एक छक्कासहित १४ रन बनाए । १५औँ ओभरको अन्तिम बलमा हर्मितलाई मोहमद मोहसिनले हेमन्त धामीबाट क्याच गराए ।

ब्रान्डन म्याकमुलमले पनि १२ बलमा एक छक्कासहित १४ रन नै थपे । १६औँ ओभरको अन्तिम बलमा जिम्मी निसमले म्याकमुलमलाई बोल्ड गरे । 

सुदूरपश्चिमका कप्तान ऐरीले नौ रन बनाए । आसिफ शेखले एक रन मात्र थप्न सके । यी दुवैलाई जनकपुरले १९औँ ओभरमा पभेलियन फर्काएको थियो ।

१९औँ ओभरमा जनकपुरका मोहमद मोहसिनले दुई विकेट लिए । उनले ओभरको पहिलो बलमा ऐरीलाई हेमन्त धामीबाट क्याच गराए । पाँचौँ बलमा आसिफलाई ललितनारायण राजवंशीबाट क्याच गराए ।

स्कट कुग्गेलेनले १३ रन बनाए । १० बमा दुई चौका प्रहार गरेका कुग्गेलेनलाई २०औँ ओभरको पहिलो बलमा किशोर महतोले बोल्ड गरे । सोही ओभरको चौथो बलमा किशोरले सुदूरपश्चिमका नरेश बुढाऐरलाई शेर मल्लबाट क्याच गराए । नरेशले तीन बलमा एक छक्कासहित आठ रन बनाए । 

इनिङको अन्तिम बलमा रनआउट भएका इशान पाण्डेले दुई बलमा एक चौकासहित ६ रन बनाए ।

जनकपुरका मोहमद मोहसिन र किशोर महतोले समान तीन विकेट लिए । चार ओभर बलिङ गरेका मोहसिनले ४० रन खर्चिए । चार ओभर बलिङ गरेका किशोरले २५ रन खर्चिए ।

जनकपुरबाट बलिङमा ललितनारायण राजवंशी सबैभन्दा किफायली बलर बने । एक विकेट लिएका ललितले चार ओभरमा १५ रन मात्र खर्चिए । उनले एक मेडन समेत फ्याँके । जिम्मी निसम एक विकेट हात पारे ।

प्रतियोगिताको लिग चरणबाट शीर्ष दुईमा रहँदै प्लेअफ आइपुगेका टिम हुन्, जनकपुर र सुदूरपश्चिम । लिग चरणका सातमध्ये एक खेलमा मात्र हार व्यहोरेको सुदूरपश्चिमले १२ अंकसहित शीर्ष स्थान हासिल गरेको थियो । दोस्रो स्थानमा रहँदै प्लेअफ आएको जनकपुरले समान खेल खेल्दा दुई हारसहित १० अंक जोडेको थियो ।

लिग चरण र प्लेअफमा सुदूरपश्चिमले जनकपुरलाई हराएको थियो । सुदूरपश्चिमले जनकपुरविरुद्ध लिग चरणमा ७२ रनको र पहिलो क्वालिफायरमा आठ विकेटको जित निकालेको थियो ।