काठमाडौं । अमेरिकाका नवनिर्वाचित राष्ट्रपति डोनाल्ड ट्रम्पले छिमेकी राष्ट्र क्यानडाका विषयमा फेरि विवादास्पद अभिव्यक्ति दिएका छन् । करका विषयमा ट्रम्प र क्यानडाबीच तनाव बढिरहेका बेला उनले विवादास्पद अभिव्यक्ति दिएका हुन् ।

ट्रम्पले यसअघि क्यानडामाथि कर लगाउने बताएका थिए । यति बेला भने उनले सामाजिक सञ्जाल ट्रुथमा राखेको एउटा पोस्टले चर्चा पाइरहेको छ । पोस्टमा उनले क्यानडाका अधिकांश नागरिक अमेरिकाको ५१औँ राज्य बन्न चाहेको उल्लेख गरेका छन् ।

“कसैले जवाफ दिन सक्दैन, किन हामी क्यानडालाई वार्षिक एक अर्ब डलरभन्दा बढी सब्सिडी दिन्छौँ ? यसको कुनै अर्थ छैन ! धेरै क्यानडाली यो अमेरिकाको ५१औँ राज्य होस् भन्ने चाहन्छन् । यसले उनीहरूको कर र सैन्य सुरक्षामा धेरै बचत गर्नेछ । मलाई लाग्छ, यो एक उच्च विचार हो । ५१औँ राज्य,” डोनाल्ड ट्रम्पले लेखेका छन् ।

ट्रम्पले यसअघि आप्रवासी र अवैध लागुऔषध कारोबार रोक्न क्यानडा र मेक्सिकोमाथि कर लगाउनु आवश्यक रहेको बताएका थिए ।

उनले आउँदो जनवरी २० मा पदभार ग्रहण गर्नेबित्तिकै क्यानडा, मेक्सिको र चीनविरुद्ध कर लगाउने ‘कार्यकारी आदेश’मा हस्ताक्षर गर्ने बताएका थिए ।

क्यानडा र अमेरिका विश्वको सबैभन्दा लामो स्थल सिमाना जोडिएको देशमा पर्छन् । दुई देशबीचको व्यापार एक ट्रिलियन डलरभन्दा बढीको छ । बीबीसीबाट ।