काठमाडौं । ओखलढुंगाको चम्पादेवी गाउँपालिकाका तत्कालीन प्रमुख प्रशासकीय अधिकृत भीमप्रसाद दाहालसहित ६ जना भ्रष्टाचार मुद्दामा दोषी ठहर भएका छन् । मंगलबार विशेष अदालतका न्यायाधीशहरू खुसीप्रसाद थारू, रामबहादुर श्रेष्ठ र मुरारीबाबु श्रेष्ठको इजलासले उनीहरूलाई जनही तीन महिना कैद र एक लाख ५७ हजार ३६५ रुपैयाँ जरिवाना हुने फैसला गरेको हो ।

दोषी ठहर भएकामध्ये दाहाल सेवानिवृत्त भइसकेका छन् । दाहालसँगै दोषी ठहर हुनेमा राष्ट्रिय पुनर्निर्माण प्राधिकरण जिल्ला आयोजना कार्यान्वयन इकाइ ओखलढुंगाका तत्कालीन इन्जिनियर नवीन श्रेष्ठ र तत्कालीन सबइन्जिनियर लोकबहादुर ठकुराठी छन् ।

उनीहरूमाथि आर्थिक वर्ष ०७४/७५ मा गाउँपालिकामा सञ्चालित बीपी चोक, मिश्रभञ्ज्याङ, जौखोरिया, सिलुङ, चिलाउने र फतानेवारी सडकखण्ड निर्माण कार्यमा फिल्डको वास्तविक तथ्य बंग्याएको आरोप लागेको थियो । अदालतले कामभन्दा बढी मूल्यांकन गरेर परिमाणको झुटा बिल भरपाइ गरेको ठहर गरेको हो ।

अख्तियारले उनीहरूविरुद्ध जनही नौ लाख ४४ हजार १९५ बढी बिगो असुलउपर गर्न मागदाबी गर्दै ०८१ वैशाख २० मा मुद्दा दायर गरेको थियो । उनीहरूविरुद्ध राज्यको पदमा बसेर गरेको भ्रष्टाचारमा थप सजाय माग गरेकोमा प्रमुख कार्यकारी दाहालको हकमा दाबी नपुग्ने फैसला भएको छ ।

तर, तत्कालीन इन्जिनियर श्रेष्ठ र सबइन्जिनियर ठकुराठीको हकमा तीन महिना कैद र थप १० हजार जरिवाना हुने फैसला भएको छ ।

यस्तै, तत्कालीन उपभोक्ता समितिका अध्यक्ष लोकबहादुर थापा, सचिव पदमबहादुर कटवाल र कोषाध्यक्ष मिठुमाया गुरुङ खत्रीबाट भने एक लाख ५७ हजार ३६५ जरिवानासहित त्यति नै बिगो असुल गर्ने फैसला भएको छ ।