काठमाडौं । नेकपा एमाले आफ्नै पार्टी कार्यालयमा सर्नेगरी नयाँ भवन निर्माणका लागि शुक्रबार शिलान्यास गरिएको छ ।

भाटभटेनी सुपरमार्केटका अध्यक्ष मीनबहादुर गुरुङ र श्रीमती सावित्री गुरूङले नेकपा एमालेको पार्टी कार्यालय निर्माणका लागि १० रोपनी १४ आना जग्गा प्रदान गरेका हुन् ।

उनले नै भवन निर्माण गरेर एमालेलाई हस्तान्तरण गर्ने जनाइएको छ । कीर्तिपुर नगरपालिका–२, मैत्रीनगरस्थित एमाले कार्यालय बनाउन लागिएको हो ।

नेकपा एमालेका अध्यक्षसमेत रहेका प्रधानमन्त्री केपी शर्मा ओली र भाटभटेनीका अध्यक्ष गुरूङले भवनको संयुक्तरूपमा शिलान्यास गरेका हुन् ।

एमालेका महासचिव शंकर पोखरेलले मीनबहादुर गुरुङ र सावित्री गुरुङले सो जग्गा दान गरेको बताए । गुरुङ दम्पतीले दिएको १० रोपनी १४ आना जग्गामा एमालेको अत्याधुनिक भवन बन्नेछ । 

एमालेको कार्यालय रहेको ललितपुरको च्यासलस्थित तुलसीलाल स्मृति प्रतिष्ठानमा पटक पटक बाढीले क्षति गरेपछि कीर्तिपुरमा नयाँ भवन बनाउन लागिएको हो ।

भवन शिलान्यासपछि गुरुङले आफूले सबै पार्टीलाई सहयोग गरेको र एमालेलाई पनि सोहीअनुसार सहयोग गरेको बताए । उनले शिलान्यास गरिएको भवन एक वर्षभित्र बनाएर आउने घटस्थापनाका दिन एमालेलाई हस्तान्तरण गर्ने गुरुङले जानकारी दिए ।