काठमाडौं । सुदूरपश्चिम रोयल्सका कप्तान दीपेन्द्रसिंह ऐरीले नेपाल प्रिमियर लिग (एनपीएल) नेपालकै सबैभन्दा ठूलो लिग बनिसकेको बताएका छन् । सोमबार कर्णाली याक्सविरुद्ध ६ विकेटको जित निकालेपछि दीपेन्द्रले एनपीएल नेपालको ठूलो लिग बनिसकेको बताए ।

दीपेन्द्रको टोली सुदूरपश्चिमले जितसँगै एनपीएल लिग चरणमा शीर्ष स्थान हासिल गर्दै प्लेअफ यात्रा तय गरेको थियो ।

उनले आफ्नो टिम राम्रो लयमा रहेको बताउँदै उपाधि नै टिमको लक्ष्य रहेको प्रतिक्रिया दिए ।

“हामीले अरूको खेलबारे नसोची आफ्नो खेल खेलिरहेका थियौँ । प्लेअफमा पनि के आवश्यक त्यो थियो, त्यो अनुसार गरिरहेका थियौँ । सबै जना राम्रो फर्ममा छन्, राम्रो फर्ममा छन्,” दीपेन्द्रले भने, “सुरुदेखि नै भनिरहेका छौँ, ट्रफी लैजान्छौँ भनेर । यसका लागि राम्रो खेल्नुपर्छ । यो नेपालको सबैभन्दा ठूलो लिग भइसकेको छ । क्यानलाई धन्यवाद भन्न चाहन्छु । समर्थकले पनि सबै टिमलाई समर्थन गरिरहनुभएको छ ।”

जितसँगै लिग लिडर बनेको सुदूरपश्चिमले सात खेलबाट १२ अंक जोडेको छ । सुदूरपश्चिमले अब प्रतियोगिताको पहिलो क्वालिफायरमा बुधबार जनकपुर बोल्ट्सविरुद्ध प्रतिस्पर्धा गर्नेछ ।

यता, हारका बावजुद कर्णालीले पनि प्लेअफमा स्थान बनाएको छ । सात खेलबाट आठ अंक जोडेको कर्णालीले चौथो स्थानमा रहँदै प्लेअफ यात्रा तय गरेको हो । कर्णालीले बुधबार नै प्रतियोगिताको इलिमिनेटरमा चितवन राइनोजविरुद्ध प्रतिस्पर्धा गर्ने तालिका छ ।