काठमाडौं । एनसेल फाउन्डेसनले र जोन्टा क्लबको संयुक्त पहलमा लैंगिक हिंसाविरुद्धको १६ दिने अभियानअन्तर्गत विभिन्न जनसचेतनामूलक कार्यक्रम आयोजना गरेर सम्पन्न भएको छ । हरेक वर्ष नोभेम्बर २५ देखि डिसेम्बर १० सम्म मनाइने अभियानको समापन कार्यक्रम गत मंगलबार एक प्यानल डिस्कसनको आयोजना गरी समापन भएको छ ।  

अभियानको सुरुवात 'बालविवाह, घरेलु हिंसा र महिलाका अधिकारसँग सम्बन्धित कानुनी प्रावधानहरू' शीर्षकको ज्ञानवर्धक पुस्तिका सार्वजनिक गर्दै सुरु गरिएको थियो । यस पुस्तिकाले बालविवाह, घरेलु हिंसा र महिलाका अधिकारहरू सम्बोधन गर्न नेपालमा रहेका कानुनी प्रावधानबारे समुदाय र सरोकारवालालाई जानकारी दिने उद्देश्य लिइएको छ । कार्यक्रममा महिला नेतृत्वमा रहेका संस्था, निजी क्षेत्रका प्रतिनिधि र विभिन्न सरोकारवालाले बालविवाह अन्त्यका समाधानबारे छलफल गरेका थिए ।

यसै अभियानलाई अघि बढाउँदै एनसेल फाउन्डेसन, साथी र जोन्टा क्लब काठमाडौंले लैंगिक हिंसा अन्त्य गर्ने आफ्नो साझा प्रतिबद्धतालाई अगाडि बढाउँदै ‘ओरेन्ज द स्कूल’ कार्यक्रम पनि सञ्चालन गरिएको थियो । यस संयुक्त पहलले सरकारी तथा निजी गरी १२ विद्यालयमा करिब एकहजार ७०० विद्यार्थीलाई प्रत्यक्षरूपमा सहभागी गराएर विद्यार्थी र शिक्षकलाई लैंगिक हिंसा, बालविवाह, साइबर बुलिङ, साइबर सुरक्षा तथा डेटा प्राइभेसीजस्ता जान्नैपर्ने विषयमा जानकारी दिने काम भएको जनाइएको छ । यस्तै, सुरक्षित तथा समान वातावरणको प्रवर्धन गर्न कदम चाल्नुको महत्त्वबारे सचेतना जगाउने काम गरिएको थियो ।  

यस अभियानको दौरान बालविवाह, साइबर सुरक्षा र घरेलु हिंसाबारे छलफल, भिडियो प्रदर्शन र अन्तरक्रियात्मक सत्रहरू विद्यालयहरूमा सञ्चालन भइरहेका थिए ।

अभियानको समापन कार्यक्रममा ललितपुर महानगरपालिकाकी उपमेयर मञ्जली शाक्य बज्राचार्य र सशस्त्र प्रहरी बलकी असिस्टेन्ट जेनरल अफ पुलिस फूलकुमारी पौडेलसहितले सहभागिता जनाएका थिए । यस अवसरमा लैंगिक असमानता, जलवायु परिवर्तन र महिलामाथि हुने हिंसाका चुनौतीहरू र समाधान विषयमा प्यालन डिस्कसनको आयोजना भएको थियो ।

यसको सञ्चालन जोन्टा इन्टरनेसनलको जिल्ला २५ समितिकी अध्यक्ष सोनी जोशीले गरेकी थिइन् । प्यानलमा एनसेलकी हेड अफ कर्पोरेट कम्युनिकेसन एन्ड सीएसआर विशाखा लक्ष्मी खड्का, खालिसिसीका सीईओ अमुन थापा, साथीकी सुलक्षणा राणा, इसीमोडकी मन्दिरा श्रेष्ठ, र युनेस्कोकी जुही अधिकारीसहितका वक्ताहरूको सहभागिता थियो । यस छलफल सहकार्यमा आधारित समाधानहरू अपनाई लैंगिक असमानता समाधान गर्ने, जलवायु परिवर्तनले प्रभावित हुने जनसमुदायलाई सहयोग पुर्‍याउने र यसमा युवाहरूको भूमिका र उपायहरूबारे केन्द्रित थियो ।

अभियानबारे आफ्नो विचार व्यक्त गर्दै एनसेलकी विशाखा लक्ष्मी खड्का हेड अफ कर्पोरेट कम्युनिकेसन एन्ड सीएसआरले भनिन्, “यस अभियानले संयुक्तरूपमा गरेका पहलले अर्थपूर्ण परिवर्तन ल्याउन सक्छ भन्ने कुरालाई पुष्टि गरेको छ । विविध सरोकारवालाहरूलाई समेटेर युवाहरूको आवाजलाई सशक्त बनाएर, हामीले लैंगिक हिंसामुक्त भविष्य निर्माणतर्फ हाम्रो पहल र आवश्यक सहयोग सुरु गरेका छौँ ।”

जोन्टा क्लब काठमाडौंकी अध्यक्ष बिना राणाले लैंगिक हिंसा, बालविवाह र जलवायु परिवर्तनसँगको सम्बन्धको विषयमा सामूहिक साझेदारीको आवश्यकताका जोड दिइन् । उनले यस १६ दिनको सक्रियता अभियानको सफलताबारे चर्चा गर्दै एनसेल फाउन्डेसन र साथीको समर्थनमा ‘ओरेन्ज द स्कुल’ पहलले १२ विद्यालयका एकहजार ७०० भन्दा बढी विद्यार्थी माझ लैंगिक हिंसा, बालविवाह र साइबर सुरक्षासम्बन्धी चेतना फैलाउन सफल भएको बताइन् ।

एनसेल फाउन्डेसन र जोन्टा क्लबद्वारा सञ्चालित १६ दिने सक्रियता अभियानले लैंगिक हिंसा अन्त्य गर्न सामुदायिक प्रयासका लागि एक बलियो उदाहरण प्रस्तुत गरेको जनाइएको छ ।