काठमाडौं । नेपाल प्रिमियर लिग (एनपीएल) मा लुम्बिनी लायन्सविरुद्ध कर्णाली याक्सले १२९ रनको लक्ष्य प्रस्तुत गरेको छ । शुक्रबार कीर्तिपुरस्थित त्रिवि क्रिकेट मैदानमा जारी खेलमा टस हारेर ब्याटिङमा आएको कर्णालीले निर्धारित २० ओभरमा आठ विकेट गुमाएर १२८ रनको योगफल खडा गरेको हो ।

कर्णालीबाट विलियम बोसिस्टोले सर्वाधिक ४४ रन बनाए । उनले ३० बलमा तीन चौका र तीन छक्का प्रहार गरे । अर्जुन घर्तीले २५ बलमा दुई चौका र एक छक्कासहित २५ रन बनाए । 

४७–४ को स्थितिबाट यी दुईले पाँचौँ विकेटका निम्ति ७२ रनको साझेदारी गर्दै कर्णालीलाई सम्मानजनक योगफलसम्म पुर्‍याएका थिए ।

ओपनर बाबर हायातले २२ बलमा एक चौका र एक छक्कासहित २० रन थपे । चान्डिविक वाल्टनले १५ बलमा एक छक्कासहित १३ रन बनाए । यसबाहेक कर्णालीका अरू ब्याटरले दोहोरो अंकमा रन जोड्न सकेनन् ।

लुम्बिनीका विकाश अग्रीले तीन विकेट लिए । दुई ओभर बलिङ गरेका अग्रीले १४ रन मात्र खर्चिए । तिलक भण्डारीले दुई विकेट लिए । रेमोन सिमोन्ड्स, साद बिन जफर र रोहितकुमार पौडेलले समान एक विकेट लिए ।

प्रतियोगिताको प्लेअफ यात्रा बलियो बनाउन कर्णाली आज जितको दबाबमा छ । पाँच खेलबाट ६ अंक जोडेको कर्णाली तालिकाको चौथो स्थानमा छ । प्रतियोगितामा कर्णालीले तीन खेलमा जित र दुईमा हारको नतिजा आत्मसात् गरेको छ ।

कर्णालीले लिगका सुरुआती दुई खेलमा हार व्यहोरेको थियो । त्यसपछिका तीन खेलमा भने कर्णालीले लगातार जित निकालेको छ । कर्णाली पहिलो खेलमा जनकपुर बोल्ट्ससँग आठ विकेटले पराजित भएको थियो । दोस्रो खेलमा कर्णाली काठमाडौं गुर्खाजसँग तीन विकेटले हारेको थियो ।

त्यसपछि भने कर्णालीले तेस्रो खेलमा चितवन राइनोजविरुद्ध ६ विकेट, चौथो खेलमा विराटनगर किंग्सविरुद्ध सात रन र पाँचौँ खेलमा पोखरा एभेन्जर्सविरुद्ध सात विकेटको जित निकालेको थियो ।

लुम्बिनीले प्रतियोगिताका सुरुआती चार खेलमा लगातार हार व्यहोरेको थियो । रोहितकुमार पौडेलको कप्तानीमा रहेको टोलीले पहिलो खेलमा विराटनगर किंग्ससँग दुई विकेट, दोस्रो खेलमा पोखरा एभेन्जर्ससँग १० विकेट, तेस्रो खेलमा सुदूरपश्चिम रोयल्ससँग ४५ रन र चौथो खेलमा जनकपुर बोल्ट्ससँग एक रनको हार व्यहोरेको थियो ।

लुम्बिनील पाँचौँ खेलमा चितवन राइनोजविरुद्ध ३३ रनको जित निकालेको थियो । छैटौँ खेलमा लुम्बिनीले काठमाडौं गुर्खाजसँग १८ रनको हार व्यहोरेको थियो ।