काठमाडौं । नेपाल प्रिमियर लिग (एनपीएल)मा लुम्बिनी लायन्सविरुद्ध कर्णाली याक्सले पहिले ब्याटिङ गर्दै छ । शुक्रबार कीर्तिपुरस्थित त्रिवि क्रिकेट मैदानमा टस जितेर लुम्बिनीले फिल्डिङको निर्णय लिएपछि कर्णाली ब्याटिङमा उत्रिएको हो ।

जारी खेलको दुई ओभरको खेल सकिँदा कर्णालीले विकेट नगुमाई ६ रन बनएको छ । पाँच खेलबाट ६ अंक जोडेको कर्णाली तालिकाको चौथो स्थानमा छ । प्रतियोगितामा कर्णालीले तीन खेलमा जित र दुईमा हारको नतिजा आत्मसात् गरेको छ ।

कर्णालीले लिगका सुरुआती दुई खेलमा हार व्यहोरेको थियो । त्यसपछिका तीन खेलमा भने कर्णालीले लगातार जित निकालेको छ । कर्णाली पहिलो खेलमा जनकपुर बोल्ट्ससँग आठ विकेटले पराजित भएको थियो । दोस्रो खेलमा कर्णाली काठमाडौं गुर्खाजसँग तीन विकेटले हारेको थियो ।

त्यसपछि भने कर्णालीले तेस्रो खेलमा चितवन राइनोजविरुद्ध ६ विकेट, चौथो खेलमा विराटनगर किंग्सविरुद्ध सात रन र पाँचौँ खेलमा पोखरा एभेन्जर्सविरुद्ध सात विकेटको जित निकालेको थियो ।

लुम्बिनीले प्रतियोगिताका सुरुआती चार खेलमा लगातार हार व्यहोरेको थियो । रोहितकुमार पौडेलको कप्तानीमा रहेको टोलीले पहिलो खेलमा विराटनगर किंग्ससँग दुई विकेट, दोस्रो खेलमा पोखरा एभेन्जर्ससँग १० विकेट, तेस्रो खेलमा सुदूरपश्चिम रोयल्ससँग ४५ रन र चौथो खेलमा जनकपुर बोल्ट्ससँग एक रनको हार व्यहोरेको थियो ।

लुम्बिनील पाँचौँ खेलमा चितवन राइनोजविरुद्ध ३३ रनको जित निकालेको थियो । छैटौँ खेलमा लुम्बिनीले काठमाडौं गुर्खाजसँग १८ रनको हार व्यहोरेको थियो ।