काठमाडौं । नेपाल प्रिमियर लिग (एनपीएल)मा विराटनगर किंग्सविरुद्ध पोखरा एभेन्जर्सले सुपर ओभरमा १३ रनको रोमाञ्चक जित निकालेको छ । बिहीबार कीर्तिपुरमास्थित त्रिवि क्रिकेट मैदानमा सम्पन्न खेलको सुपर ओभरमा पोखराले दिएको १९ रनको लक्ष्य पछ्याउने क्रममा विराटनरले ६ बलमा पाँच रनमात्र बनाउन सक्यो ।

पोखराबाट बलिङमा रेमोन रेफर आएका थिए । उनको पहिलो बलमा विराटनगरका मार्टिन गप्टिलले एक रन लिए । दोस्रो बलमा विराटनगरका निकोलस किर्टोनले पनि एक रन नै लिए । तेस्रो बलमा गप्टिलले पुनः एक रन नै लिए ।

यसपछि विराटनगरलाई तीन बलमा १६ रनको आवश्यकता थियो । चौथो बल रेफरले डट फ्याँके । पाँचौँ बलमा किर्टोनले एक रन लिए । अन्तिम बलमा जितका निम्ति १५ रन आवश्यक हुँदा रेफरले वाइड फ्याके । पुनः अन्तिम बल रेफरले डट राखेपछि पोखराले सुपर ओभरमा १३ रनको जित निकालेको हो ।

सुपर ओभरमा पहिले ब्याटिङमा आएको पोखराले ६ बलमा १८ रन बनाएको थियो । सुपर ओभरमा पोखराका रेमोन रेफरले १७ र आन्द्रियस गौसले एक रन बनाए । सुपर ओभरमा विराटनगरबाट कप्तान सन्दीप लामिछाने बलिङमा आएका थिए । सन्दीपको पहिलो र दोस्रो बलमा रेफरले लगातार छक्का प्रहार गरे । तेस्रो बल सन्दीपले डट फ्याके पनि चौथो बलमा रेफरले पुनः चौका प्रहार गरे । पाँचौँ बलमा रेफरले एक रन लिए । छैटौँ बल गौसले एक रन बनाए ।

त्यसअघि, टस जितेर ब्याटिङमा आएको विराटनगरले पहिलो इनिङको निर्धारित २० ओभरमा सात विकेट गुमाएर १३९ रनको योगफल खडा गरेको थियो । १४० रनको लक्ष्यसहित मैदान उत्रिएको पोखराले पनि निर्धारित २० ओभरमा ६ विकेट गुमाएर १३९ रन नै बनाएपछि खेल सुपर ओभरमा पुगेको हो ।

पोखरालाई अन्तिम ओभरमा जितका निम्ति १४ रनको आवश्यकता थियो । पोखराबाट क्रिजमा रेमोन रेफर र नारायण जोशी थिए । विराटनगरबाट बलिङमा आएका बसिर अहमेदले पहिलो बल डट फ्याFके । दोस्रो बलमा पनि बसिरले एक रनमात्र खर्चिए । तेस्रो बलमा रेफरले छक्का प्रहार गरेपछि पोखरालाई जितका निम्ति तीन बलमा सात रनको आवश्यकता थियो । चौथो बल बसिरले पुनः डट फ्याँके । पाँचौँ बल पनि बसिरले डट फ्याकेपछि पोखरालाई जितका निम्ति अन्तिम बलमा सात रनको आवश्यकता थियो । अन्तिम बलमा रेफरले छक्का प्रहार गरेपछि खेल ‘टाई’ भएको हो । पोखराका रेफर ३४ र नारायण जोशी दुई रनमा अविजित थिए ।

पोखराका ओपनर आन्द्रियस गौसले ३९ रन बनाए । उनले २७ बलमा सात चौका प्रहार गरे । गौसले पहिलो विकेटका निम्ति अर्का ओपनर दिनेश खरेलसँग ४.३ ओभरमा ४७ रनको साझेदारी गर्दै पोखरालाई बलियो सुरुआत दिलाएका थिए । गौसलाई ११औँ ओभरको तेस्रो बलमा प्रतिश जिसीले बसिर अहमेदबाट क्याच गराए । ११ रन बनाएर आउट भएका दिनेशले ११ बलमा एक छक्का प्रहार गरे । दिनेशलाई पाँचौँ ओभरको तेस्रो बलमा प्रतीश जीसीले अनिल खरेलबाट क्याच गराएका थिए ।

कप्तान कुशल भुर्तेलले ३१ रन थपे । उनले ३४ बलमा दुई चौका र एक छक्का प्रहार गरे । भुर्तेल र गौसले दोस्रो विकेटका निम्ति ४१ रनको साझेदारी गरेका थिए । कुशललाई १५औँ ओभरको दोस्रो बलमा क्रिस सोलले विकेटकिपर स्कट एड्वार्ड्सबाट क्याच गराएका थिए । माइकल लियस्कले १२ बलमा एक छक्कासहित ११ रन बनाए । उनलाई १९औँ ओभरको चौथो बलमा प्रतीश जीसीले बोल्ड गर्दै पभेलियनको दिशा देखाए ।

पोखराको खातामा जेन मलिकले चार रन थप्दा तिर्थराज दास भने ‘गोल्डेन डक’ भए । मलिकलाई १३औँ ओभरको पाँचौँ बलमा प्रतिश जीसीले बोल्ड गरे । तिर्थराजाई क्रिस सोलले एलबीडब्लूको धरापमा पारे ।

विराटनगरका प्रतीश जीसीले चार विकेट लिए । चार ओभरको आफ्नो स्पेलमा प्रतिशले १८ रनमात्र खर्चिए । योसँगै प्रतिशले प्रतियोगितामा कुल नौ विकेट पुर्‍याएका छन् । उनी सर्वाधिक विकेट लिने खेलाडीको सूचीमा संयुक्तरूपमा पहिलो स्थानमा छन् ।

त्यसअघि टस जितेर ब्याटिङमा आएको विराटनगरले निर्धारित २० ओभरमा सात विकेट गुमाएर १३९ रनको योगफल खडा गरेको थियो ।

विराटनगरका स्कट एड्वाडर्सले सर्वाधिक ४५ रन बनाए । उनले ३५ बलमा पाँच चौका प्रहार गरे ।

त्यसअघि विराटनगरले ओपनरद्वय मार्टिन गप्टिल र लोकेश बमसँगै नरेन भट्टलाई गुमाएको थियो । लोकेशले २६ रन जोड्दा गप्टिल पाँच र नरेन चार रनमा पभेलियन फर्किए । क्रिस सोल पनि सात रनमात्र थप्न सके । दीपक बोहराले चार रन जोडे ।

अविजित रहेका बसिर अहमेदले २१ र प्रतिश जिसीले चार रन बनाए ।

विराटनगरविरुद्ध पोखराका सागर ढकाल र रेमोन रेफरले समान दुई विकेट लिए । कप्तान कुशल भुर्तेल र दिनेश खरेलले एक–एक विकेट लिए ।

विराटनगरका गप्टिललाई पाँचौँ ओभरको तेस्रो बलमा सागर ढकालले बोल्ड गरे । छैटौँ ओभरको अन्तिम बलमा पोखराका रेमोन रेफरले लोकेशलाई ‘कट एन्ड बोल्ड’ गरे ।

आठौँ ओभरको पहिलो बलमा विराटनरले तेस्रो क्रमका ब्याटर नरेन भट्टलाई गुमायो । नरेनलाई दिनेश खरेलले सागर ढकालबाट क्याच गराए ।

यस्तै, १३औँ ओभरको पहिलो बलमा विराटनगरका निकोलस किर्टोनलाई सागर ढकालले माइकल लियस्कबाट क्याच गराउँदै पभेलियनको दिशा देखाए ।

विराटनरले १९औँ ओभरको दोस्रो बलमा एड्वाडर््सलाई गुमायो । एडवार्ड्सलाई पोखराका कप्तान कुशल भुर्तेलले ‘एलबीडब्लू’ को धरापमा पारे ।

२०औँ ओभरको पहिलो बलमा विराटनगरका क्रिस सोललाई रेमोन रेफरले विपीन खत्रीबाट क्याच गराए । सोही ओभरको तेस्रो बलमा विराटनगरका दीपक बोहरा रनआउट भए । रेफरले बल ‘वाइड’ हुँदा पनि रनका निम्ति दौडिएका दीपकलाई रेफरले नै रनआउट गराए ।

प्रतियोगितामा पोखराको यो दोस्रो जित हो । पोखराले आफ्नो पहिलो खेलमा चितवन राइनोजसँग ८७ र दोस्रो खेलमा जनकपुर बोल्ट्ससँग सात विकेटको हार बेहोरेको थियो । तेस्रो खेलमा लुम्बिनी लायन्सविरुद्ध १० विकेटको जित निकालेको पोखराले चौथो खेलमा कर्णाली याक्ससँग पुनः सात विकेटको हार बेहोरेको थियो ।

प्रतियोगितामा विराटनगरको भने यो चौथो हार हो । विराटनगरले प्रतियोगिताको पहिलो र दोस्रो खेलमा क्रमशः जनकपुर र सुदूरपश्चिम रोयल्ससँग आठ विकेटको र ९० रनको हार बेहोरेको थियो । तेस्रो खेलमा लुम्बिनीविरुद्ध दुई विकेटको जित निकालेको विराटनगर चौथो खेलमा कर्णाली याक्ससँग सात रनले पराजित भएको थियो ।