काठमाडौं । राज्य व्यवस्था तथा सुशासन समितिका सभापति रामहरि खतिवडाले प्रधानमन्त्रीको निर्देशन कर्मचारीले नटेर्ने प्रवृत्ति विकास भएको बताएका छन् । भ्रष्टाचारविरुद्ध अन्तर्राष्ट्रिय दिवसको अवसरमा सोमबार ललितपुरमा आयोजित कार्यक्रममा सभापति खतिवडाले मुख्यसचिवले कर्मचारीलाई दिएको निर्देशन पालना नहुने गरेको बताए ।

उनले सरकार र मुख्यसचिवले भनेको नमान्ने तर अख्तियारले भन्दा १० मिनेटमा काम गर्ने प्रचलन कर्मचारीतन्त्रमा हाबी भएको बताए । उनले अख्तियारसँग डन्डा, कानुन र हत्कडी लगाउने क्षमता भए पनि सहीरूपमा प्रयोग हुनुपर्ने बताए ।

"अख्तियारमा प्रधानमन्त्रीले भनेको कुरा नहुने तर अख्तियारले भनेको मात्रै काम हुने पद्धतिको विकास भयो भने सरकार कहाँ जान्छ त्यो विषयमा कर्मचारीहरूले ध्यान दिनू । मुख्यसचिवले कर्मचारीहरूलाई एउटा निर्देशन दिँदा निर्देशन पालना गर्न अन्कनाउनुहुन्छ । अख्तियारले भन्यो भने १० मिनेटमा काम सक्नुहुन्छ । किनभने अख्तियारमा डन्डा, कानून र हत्कडी लगाउने क्षमता पनि छ । त्यो सहीरूपमा प्रयोग हुनुपर्छ भन्ने हाम्रो चाहना छ," उनले भने ।

खतिवडाले समितिले बेनामीमा भ्रष्टचारको मुद्दा दर्ता गर्न नपाउने व्यवस्था राख्ने गरी कानून बनाउन लागेको पनि बताए । उनले बजेट छुट्याउँदैमा मानिस जेल जानुपरे विकास निर्माणका कामहरू अगाडि बढ्न नसक्ने बताए ।