काठमाडौं । नेपाल प्रिमियर लिग (एनपीएल)को टोली जनकपुर बोल्ट्सका विकेटकिपर ब्याटर आसिफ शेखले टिमको लक्ष्य उपाधि जित्ने भएको हुँदा यसैमा अघि बढिरहेको बताएका छन् ।

जनकपुरले आइतबार भएको खेलमा लुम्बिनी लायन्सविरुद्ध एक रनको रोमाञ्चक जित निकालेको थियो । कीर्तिपुरस्थित त्रिवि क्रिकेट मैदानमा भएको खेलमा जनकपुरले पहिले ब्याटिङ गर्दै १३६ रनको योगफल खडा गरेको थियो । १३७ रनको लक्ष्यसहित मैदान उत्रिएको लुम्बिनीले निर्धारित २० ओभरमा आठ विकेट गुमाएर १३५ रनमात्र बनाएपछि जनकपुरले एक रनको साँघुरो जित निकालेको हो ।

जितपछि पत्रकारसँगको कुराकानीमा आसिफले टिमको माहोल राम्रो भएको हुँदा नतिजा पनि राम्रो आइरहेको प्रतिक्रिया दिए ।

“टिमको माहोल राम्रो छ । माहोल राम्रो बन्यो, सबै आफैँ सबै कुरा राम्रो हुँदै जान्छ । सबैजना सकारात्मक रहौँ भन्ने योजना नै हाम्रो हो । एकजुट भएर खेलिरहेका छौँ,” आसिफले भने, “टी–२० मा सहज कहिल्यै पनि हुन सकिँदैन । हाम्रो लक्ष्य उपाधि जित्ने हो । एकपटकमा एक खेललाई हेरिरहेका छौँ । फरक खेलमा फरक खेलाडीले राम्रो खेलिरहेका छन् । यसले टिमलाई सहयोग गरिरहेको छ ।”

आसिफले प्रतियोगितामा व्यक्तिगत प्रदर्शनबाट भने आफू सन्तुष्ट बन्न नसकेको बताए ।

“आफूबाट जति आशा गरेको थिएँ, त्यति भएको छैन । राम्रो सुरुआत भएपछि म त्यसलाई ठूलो स्कोरसम्म लैजान सक्छु । तर, पछिल्ला तीन खेलमा त्यस्तो हुन सकेको छैन । मेरो अहिले यसैमा प्रयास जारी छ,” उनले थपे ।

प्रतियोगितामा लगातार चार जित निकालेको जनकपुर आठ अंकसहित तालिकाको शीर्ष स्थानमा उक्लिएको छ । जनकपुर प्रतियोगितामा अहिलेसम्म अपराजित एकमात्र टिमसमेत हो ।

यता, चार खेलमध्ये सबैमा हार बेहोरेको लुम्बिनी भने तालिकाको पुछारमा छ । लगातार चौथो हारले लुम्बिनीको प्लेअफ सम्भावना कमजोर बनेको छ ।