पोखरा । कास्की जिल्ला अदालतले राष्ट्रिय स्वतन्त्र पार्टी (रास्वपा)का सभापति रवि लामिछानेको स्वास्थ्य जाँच गरी त्यसको रिपोर्ट पेस गर्न आदेश दिएको छ । सहकारी ठगी, किर्ते, संगठित अपराध, सम्पत्ति शुद्धीकरणसम्बन्धी कसुरमा अनुसन्धानका क्रममा लामिछाने हाल जिल्ला प्रहरी कार्यालय कास्कीको हिरासतमा छन् ।

चितवनमा बयान सकाएर गएको बुधबार राति लामिछानेलाई पोखरा ल्याइएको थियो । त्यति बेला लामिछानेमा उच्च रक्तचाप रहेको तर चितवन प्रहरीले औषधि समेत खान नदिएको र अमानवीय कार्य गरेको भन्दै उनीनिकट व्यक्ति र रास्वपा नेता–कार्यकर्ताले विरोध जनाइरहेका छन् ।

चितवनबाट बिहीबार बिहान पोखरा ल्याइपुर्‍याएपछि लामिछानेको स्वास्थ्य जाँच गरिएको थियो ।

मानवअधिकार आयोग गण्डकीको टोलीले शनिबार (हिजो) लामिछानेलाई भेटेको थियो । त्यसक्रममा लामिछानेले चितवनमा आफ्नो स्वास्थ्य जाँच गराउन भने पनि प्रहरीले नमानेको बताएका जनाइएको छ । पोखरामा स्वास्थ्य जाँच गर्दा आफ्नो रक्तचाप १८०/९० देखिएको उनले बताएका टोलीको भनाइ छ । मानवअधिकार आयोगको टोलीले प्रहरीको यो कार्य अमानवीय रहेको जनाएको छ ।

अदालतले पनि लामिछानेको स्वास्थ्य जाँचका विषयमा बोलेको हो । आइतबार म्याद थपका निम्ति लामिछानेलाई अदालत लगिएको थियो । अदालतले अनुसन्धानका लागि फेरि चार दिन म्याद थपेको छ । सँगै अदालतका न्यायधीश हिमलाल बेल्वासेको इजलासले लामिछानेको आवश्यक जाँच र उपचार गराउन आदेश दिएको छ । अदालतमा त्यसको प्रतिलिपि बुझाउन समेत आदेश दिइएको छ ।

“प्रतिवादीहरू रवि लामिछाने र छविलाल जोशीको उच्च रक्तचापको समस्या रहेको भन्ने देखिएको हुँदा चिकित्सकबाट जाँच तथा आवश्यक उपचार गराई उपचारसँग सम्बन्धित कागजातको प्रतिलिपि यस अदालतमा पेस गर्नू र अनुसन्धानका क्रममा हिरासतमा राख्नका लागि म्याद थप गरिएका व्यक्तिहरूको मानवअधिकारको उल्लंघन हुने कुनै कार्य नगर्नू/नगराउनू भनी जिल्ला प्रहरी कार्यालय कास्कीलाई लेखी पठाउनू,” आदेशमा भनिएको छ ।