काठमाडौं । हर्ष थाकेरको उत्कृष्ट बलिङप्रेरित जनकपुर बोल्ट्सले नेपाल प्रिमियर लिग (एनपीएल)मा लुम्बिनी लायन्सविरुद्ध एक रनको रोमाञ्चक जित निकालेको छ । आइतबार कीर्तिपुरस्थित त्रिवि क्रिकेट मैदानमा जनकपुरले प्रस्तुत गरेको १३७ रनको लक्ष्य पछ्याएको लुम्बिनीले निर्धारित २० ओभरमा आठ विकेट गुमाएर १३५ रन मात्र बनाउन सक्यो ।

प्रतियोगितामा जनकपुरको यो लगातार चौथो जित हो । जनकपुरले यसअघि विराटनगर किंग्स र कर्णाली याक्सविरुद्ध समान आठ विकेटको जित निकालेको थियो । जनकपुरले तेस्रो खेलमा पोखरा एभेन्जर्सलाई सात विकेटले हराएको थियो ।

लुम्बिनीलाई अन्तिम ओभरमा जितका निम्ति नौ रन आवश्यक थियो । जनकपुरका कप्तान अनिल साहले अन्तिम ओभर बलिङको जिम्मेवारी थाकेरलाई सुम्पिए ।

थाकेरले पहिलो बलमै लुम्बिनीका साद बिन जफरलाई विकेटकिपर आसिफ शेखबाट क्याच गराए । दोस्रो बलमा दुर्गेश गुप्ताले चौका प्रहार गरेपछि लुम्बिनीलाई जितका निम्ति चार बलमा पाँच रन आवश्यक थियो । तेस्रो बल थाकेरले डट फ्याँके । चौथो बलमा दुर्गेशले एक रन लिए । पाँचौँ बलमा सन्दीप जोराले दुई रन लिए ।

यसपछि लुम्बिनीलाई अन्तिम बलमा जितका निम्ति दुई रन आवश्यक थियो । अन्तिम बलमा जोराले लामो प्रहार गरे पनि किशोर महतोले क्याच गरेपछि जनकपुरले एक रनको रोमाञ्चक जित निकालेको हो । थाकेरले अन्तिम ओभरमा सात रन खर्चिएर दुई विकेट लिए ।

लुम्बिनीका कप्तान रोहितकुमार पौडेलले ३५ रन बनाए । उनले ३८ बलमा तीन चौका प्रहार गरे । रोहितलाई १६औँ ओभरको चौथो बलमा थाकेरले जिम्मी निसमबाट क्याच गराएका थिए । रोहित पभेलियन फर्कंदा लुम्बिनीलाई २६ बलमा जितका निम्ति ३२ रन आवश्यक थियो ।

१८औँ ओभरमा थाकेरले दुई विकेट लिँदै पुनः जनकपुरलाई खेलमा फर्काए । उनले उक्त ओभरको पहिलो बलमा टम मुरेसलाई ललित राजवंशीबाट क्याच गराए । सोही ओभरको तेस्रो बलमा थाकेरले लुम्बिनीका विवेक यादवलाई जिम्मी निसमबाट क्याच गराए ।

लुम्बिनीको खातामा मुरेसले ३१ रन थपे । उनले २३ बलमा दुई चौका र एक छक्का प्रहार गरे । विवेक ‘डक’ भए ।

ओपनर अर्जुन साउदले २३ बलमा दुई चौकासहित २० रन जोडे । साउदलाई १०औँ ओभरमा शेर मल्लले बोल्ड गर्दै पभेलियन फर्काएका थिए । सन्दीप जोराले आठ बलमा एक चौका र एक छक्कासहित १६ रन बनाए । दुर्गेश गुप्ता पाँच रनमा अविजित रहे ।

लुम्बिनीविरुद्ध बलिङमा चम्किएका थाकेरले पाँच विकेट लिए । चार ओभर बलिङ गरेका उनले २३ रन खर्चिए । थाकेरले लुम्बिनीका कप्तान रोहितसहित टम मुरेस, विवेक यादव, साद बिन जफर र सन्दीप जोरालाई पभेलियन फर्काएका हुन् । यस्तै, शेर मल्ल, किशोर महतो र ललित राजवंशीले समान एक विकेट लिए ।

त्यसअघि, टस हारेर ब्याटिङमा उत्रिएको जनकपुरले निर्धारित २० ओभरमा नौ विकेट गुमाएर १३६ रन बनाएको थियो । जनकपुरका ओपनर अनिल साहले सर्वाधिक ४५ रन बनाए । यसक्रममा उनले ३९ बलमा एक चौका र चार छक्का प्रहार गरे । अनिलले पहिलो विकेटका निम्ति अर्का ओपनर आसिफ शेखसँग ५.३ ओभरमा ४८ रनको साझेदारी गर्दै उत्कृष्ट सुरुआत दिलाएका थिए । आसिफले १० बलमा दुई चौका र एक छक्कासहित १६ रन बनाए ।

४८–१ बाट अनिलले तेस्रो विकेटका निम्ति लहिरु मिलान्थासँग ४७ रनको साझेदारी गर्दै जनकपुरलाई ९५ रनको स्कोरसम्म पुर्‍याएका थिए । मिलान्थाले २३ बलमा दुई चौकासहित २४ रन थपे । अविजित रहेका शुभ कंसाकारले २४ बलमा दुई छक्कासहित २२ रन बनाए । जनकपुरका अरू ब्याटर दोहोरो अंकसम्म पुग्न सकेनन् ।

उत्कृष्ट सुरुआतका बाबजुद मध्यक्रमका ब्याटर सस्तैमा आउट हुँदा जनकपुर विशाल योगफलसम्म पुग्न सकेन । जनकपुरले ११.२ ओभरसम्म ९५ रन बनाउँदा एक विकेट मात्र गुमाएको थियो ।

सोही ओभरको तेस्रो बलमा कप्तान अनिललाई गुमाएपछि भने जनकपुरले लगातार अरू तीन विकेट गुमायो । लुम्बिनीका जोराले विवेक यादवबाट अनिललाई क्याच गराएका थिए ।

यसपछि १३औँ ओभर बलिङका निम्ति आएका अभिषेक गौतमले एकै ओभरमा तीन विकेट लिँदै जनकपुरको मध्यक्रम धराशायी बनाए । अभिषेकले १३औँ ओभरको दोस्रो बलमा लहिरु मिलान्थालाई अर्जुन साउदबाट स्टम्पिङ गरे । सोही ओभरको चौथो बलमा अभिषेकले हर्ष थाकेरलाई दुर्गेश गुप्ताबाट क्याच गराए । सोही ओभरको अन्तिम बलमा पनि अभिषेकले जिम्मी निसमलाई विकेटकिपर जिम्मी निसमबाट क्याच गराए ।

जनकपुरले १६औँ ओभरमा पुनः दुई विकेट गुमायो । लुम्बिनीका कप्तान रोहितले उक्त ओभरको दोस्रो ओभरमा मोहमद मोहसिन र चौथो बलमा शेर मल्ललाई एलबीडब्ल्यूको धरापमा पारे ।

जनकपुरलाई मध्यम योगफलमा रोक्न लुम्बिनीका अभिषेक गौतमले तीन विकेट लिए । चार ओभर बलिङ गरेका अभिषेकले २० रन खर्चिए । साद बिन जफर र कप्तान रोहितकुमार पौडेलले समान दुई विकेट लिए । सन्दीप जोराको नाममा एक विकेट रह्यो ।

लगातार चौथो जित निकालेको जनकपुर तालिकाको शीर्ष स्थानमा उक्लिएको छ । आठ अंक जोडेको जनकपुरले प्रतियोगिताको प्ले अफ पुग्ने सम्भावनालाई बलियो बनाएको छ ।

प्रतियोगितामा लुम्बिनीको भने यो लगातार चौथो हार हो । यो हारसँगै प्ले अफमा पुग्ने लुम्बिनीको सम्भावना कमजोर बनेको छ । लुम्बिनी यसअघि विराटनगर किंग्ससँग दुई विकेटले, पोखरा एभेन्जर्ससँग १० विकेटले र सुदूरपश्चिम रोयल्ससँग ४५ रनले पराजित भएको थियो ।