काठमाडौं । लुम्बिनी लायन्सका कप्तान रोहितकुमार पौडेलले आफ्नो बलिङ युनिट चुकेसँगै लोकेश बम र बसिर अहमदबीचको साझेदारी नै हारको पक्ष रहेको बताएका छन् । 

विराटनगर किंग्ससँगको हारपछि लुम्बिनीका कप्तान रोहितले आफ्नो बलरको राम्रो प्रदर्शन हुन नसक्नुको साथै लोकेश र बसिरको उत्कृष्ट ब्याटिङ पनि हारको महत्त्वपूर्ण पक्ष रहेको उल्लेख गरे । रोहितले बेन कटिङले बलिङ नगर्ने भनेपछि उनलाई अवसर नदिइएको बताए ।

साथै दुर्गेश र सिमोन्ड्सले राम्रो बलिङ गरेको रोहितको भनाइ छ । उनले बसिर र लोकेशबीचको साझेदारीले खेल टाढा लगेको उल्लेख गरे । रोहितले बलिङ युनिट कमजोरी देखिए पनि आगामी खेलमा सुधार हुने आशा गरे । 

विराटनगरका ओपनर लोकेशले आज खेल जिताउँछु भन्ने आत्मविश्वासका साथ आएको र सोहीअनुरूपमा खेल्न सकेको पनि बताए । उनले अघिल्ला दुई खेलमा राम्रो गर्न नसकेको हुँदा आज राम्रो गर्नुपर्छ भन्ने लक्ष्यसहित आएको पनि बताए । 

उनले सोहीअनुरूप सुरुदेखि नै राम्रो सुरुवात दिलाएको बताए । आकिब इलियासले आफ्नो स्ट्रेन्थअनुरूप खेल्न सुझाव दिएको र सोहीअनुरूप आफूले प्रयास गरेको लोकेशको भनाइ छ ।