काठमाडौं । यूएईमा जारी यू–१९ एसिया कप क्रिकेट प्रतियोगितामा अफगानिस्तानले नेपाललाई १२४ रनको लक्ष्य दिएको छ । दुबईको सारजाह क्रिकेट मैदानमा भइरहेको खेलमा टस जितेर पहिले व्याटिङ रोजेको अफगानिस्तानले ३५.४ ओभरमा सबै विकेट गुमाउँदै १२३ रनको योगफल बनाएको हो ।

अफगानिस्तानका लागि फैसल खानले सर्वाधिक ५२ रन जोडे । उनले ६७ बलमा चार चौका र दुई छक्का प्रहार गरे । त्यस्तै, खातीर खानले २६ बलमा १५ जोडे । अल्लाह गजान्फरले ११ तथा नासिर खानले १० रन जोडे ।

नेपालका लागि युनिशविक्रम सिंह ठकुरी र सन्तोष यादवले समान तीन तथा हेमन्त धामी, अभिषेक तिवारीले समान दुई विकेट लिए ।

नेपाल पहिलो खेलमा श्रीलंकासँग ५५ रन र दोस्रो खेलमा बंगलादेशसँग पाँच विकेटले पराजित भएको थियो । अफगानिस्तान पहिलो खेलमा बंगलादेशसँग ४५ रन र दोस्रो खेलमा श्रीलंकासँग १३१ रनले पराजित भएको थियो । रासस