विराटनगर । नेपाल क्रिकेट फाउन्डेसनको आयोजनामा विराटनगरमा जारी चौथो संस्करणको ‘इक्वालिटी कप क्रिकेट २०२५’ प्रतियोगिताको फाइनलमा मोरङ र सप्तरी प्रवेश गरेका छन् । लगातार दुई खेल जितेका मोरङ र सप्तरीले एक खेलअगावै फाइनलको यात्रा तय गरेका हुन् ।

साविक विजेता मोरङले इलामलाई ९ विकेटले पराजित गरेको छ । लगातार दुई खेलमा जित हात पार्दै चार अंक जोडेको मोरङ शीर्ष स्थानमा रहँदै फाइनलको यात्रा तय गरेको हो । लगातार दुई खेलमा पराजित इलाम प्रतियोगिताबाट बाहिरिएको छ ।  

टस जितेर ब्याटिङ गरेको इलामले निर्धारित २० ओभरको खेलमा १७.४ बलमा सबै विकेट गुमाइ ६२ रनमा सीमित भयो । इलामका कुनै पनि ब्याटरले दोहोरो अंकलाई छुन सकेनन् भने इलामले ४१ रन अतिरिक्त रन पाएको थियो ।

मोरङकी सानु राजवंशीले दुई विकेट लिँदा चाँदनी साह, फुलकुमारी राजवंशी र बन्धना राजवंशीले २–२ विकेट लिइन् ।

६३ रनको झिनो लक्ष्य पछ्याएको मोरङले ५.५ बलमा एक विकेट गुमाई सो विजयी लक्ष्य पार गरेको थियो । मोरङको जितमा प्लेयर अफ द म्याच पूर्णिमा राजवंशीले अविजित ३२ रन बनाउँदा सानु राजवंशी १० रनको योगदान दिइन् । पूर्णिमाले २७ बलमा ६ चौका प्रहार गरिन् । इलामकी रञ्जना लिम्बूले एक विकेट लिइन् ।

दोस्रो खेलमा सप्तरीले सिरहालाई आठ रनले पराजित गरेको छ । सप्तरीले खेलेको दुई खेलमा जित हात पार्दै दोस्रो स्थानमा यथावत रहँदै फाइनलमा प्रवेश गरेको हो । सिरहाले दुवै खेलमा पराजित हुँदै प्रतियोगिताबाट बाहिरिएको छ । टस जितेर ब्याटिङ गरेको सप्तरीले निर्धारित २० ओभरमा ९ विकेट गुमाउँदै १०२ रनको सामान्य योगफल तयार पारेको थियो । सप्तरीकी प्लेयर अफ द म्याच साक्षी यादवले सर्वाधिक ५७ रन बनाइन् । उनले ५४ बलमा ६ चौका प्रहार गरिन् । सिरहाकी अनुराधा चौधरीले चार विकेट लिँदा सरस्वती चौधरीले तीन विकेट लिएकी थिइन् ।

१०३ रनको सामान्य लक्ष्य पछ्याएको सिरहाले पूरै ओभर खेल्दै ९ विकेट गुमाइ ९४ रन बनाएको थियो । सिरहाकी सरस्वती मुखीयाले अविजित १३ रन बनाउँदा प्रसिद्का खड्काले अविजित ११ रन बनाइन् । सप्तरीकी अपेक्षा यादवले ४ विकेट लिँदा साक्षी यादव र सुस्मिता यादवले समान २–२ विकेट लिइन् ।

प्रतियोगितालाई म्यारिलीबोन क्रिकेट क्लब फाउन्डेसन र क्रिकेट विथआउट बाउन्ड्रीजको सहयोगमा क्रिकेटमा महिलाको सहभागिता अभिवृद्धि अभियानअन्तर्गत आयोजना भएको बताइएको छ ।