काठमाडौं । अन्तिम दुई ओभरमा कप्तान सोमपाल कामी र अर्जुन घर्तीले ४३ रन बनाएपछि नेपाल प्रिमियर लिग (एनपीएल)मा जनकपुर बोल्ट्सविरुद्ध कर्णाली याक्सले १४२ रनको लक्ष्य प्रस्तुत गरेको छ । 

कीर्तिपुरस्थित त्रिवि क्रिकेट मैदानमा टस जितेर ब्याटिङमा आएको कर्णालीले निर्धारित २० ओभरमा सात विकेट गुमाएर १४२ रनको योगफल खडा गर्‍यो ।

जनकपुरका हर्ष थाकेरले गरेको १९औँ ओभरमा अर्जुन घर्तीले दुई छक्का र दुई चौकासहित कुल ३३ रन बनाए । यस्तै, २०औँ ओभरमा सोमपाल कामीले २१ रन बनाएपछि कर्णाली प्रतिस्पर्धात्मक लक्ष्यसम्म पुगेको हो । 

७९–६ को कठिन स्थितिबाट अर्जुनले कप्तान सोमपालसँग ५६ रनको साझेदारी गर्दै कर्णालीको इनिङ सम्हालेका थिए । अन्तिमसम्म अविजित रहेका सोमपालले १३ बलमा तीन चौका र एक छक्कासहित २९ रन बनाए । गुल्सन झाले ३६ रन बनाए । उनले २७ बलमा एक चौका र तीन छक्का प्रहार गरे । 

ओपनर शिखर धवनले १४ बलमा तीन चौकासहित १४ रन थपे । बाबर हायातले १२ रन जोडे । पहिलो इनिङको कुनै पनि समयमा कर्णालीले साझेदारी बनाउन सकेन । 

कर्णालीले ६ ओभरभित्र ओपनरद्वय शिखर धवन र देव खनाललाई गुमाएको थियो । शिखरलाई हर्ष थोकरको पाँचौँ ओभरको दोस्रो बलमा बोल्ड गरे । शिखरले टिमको खातामा १४ रन बनाए । त्यसअघि कर्णालीले दोस्रो ओभरको दोस्रो बलमा ओपनर देव खनाललाई गुमाएको थियो । 

जनकपुरका ललितनारायण राजवंशीबाट बोल्ड हुनुअघि देवले टिमको खातामा एक रन थपे । कर्णालीका चान्डविक वाल्टनलाई सातौँ ओभरको अन्तिम बलमा मोहमद मोहसिनले एलबीडब्लूको धरापमा पारे । यस्तै, आठौँ ओभरको चौथो बलमा जिसान मक्सुदलाई जनकपुरका जिमी निसमले एलबीडब्लूलको धरापमा पारे । 

कर्णालीका बाबर हायात चौधौँ ओभरको दोस्रो बलमा मोहसिनले निसमबाट क्याच गराए । कर्णालीबाट सबैभन्दा धेरै रन बनाएका गुल्सन झा १६औँ ओभरको दोस्रो बलमा किशोर महतोबाट बोल्ड भए । २०औँ ओभरको चौथो बलमा अर्जुन जिम्मी निसमबाट रनआउट भए । 

आजको खेलमा कर्णाली सोमपाल कामी र जनकपुर अनिल शाहको कप्तानीमा मैदान उत्रिएका छन् । प्रतियोगितामा कर्णालीको यो पहिलो खेल हो । जनकपुरले भने यसअघि आफ्नो पहिलो खेलमा विराटनगर किंग्स्विरुद्ध आठ विकेटको जित निकालेको थियो । सोमबारको पहिलो खेलमा चितवन राइनोजले काठमाडौं गुर्खाजविरुद्ध पाँच विकेटको जित निकालेको थियो ।