काठमाडौं । नेपाल धितोपत्र बोर्डले गार्डियन माइक्रो लाइफ इन्स्योरेन्सलाई आवेदन दिएको साढे दुई महिनामै आईपीओ निष्कासन गर्न अनुमति दिएको छ । हालका कार्यवाहक अध्यक्ष महेश बरालले नयाँ अध्यक्ष आउने दिन नजिकिएपछि आवेदन दिएको साढे दुई महिनामै गार्डियनलाई आईपीओ निष्कासन गर्न अनुमति दिएका हुन् ।

दुई वर्षअघिदेखि फाइल अड्किएका कम्पनीलाई बेवास्ता गर्दै बरालले व्यावसायिक घरानाले स्वार्थ पूर्तिका लागि दुई वर्षअघि लाइसेन्स पाएका कम्पनीलाई आईपीओ निष्कासनका लागि अनुमति दिएका हुन् । यो कम्पनीले गएको भदौ २० गते धितोपत्र बोर्डमा आईपीओ निष्कासन गर्न आवेदन दिएको थियो । कम्पनीले वि.सं. २०७९ मंसिर ११ गते व्यावसायिक लाइसेन्स पाएको हो ।

बोर्डले कम्पनीलाई आईपीओ निष्कासन गर्न गएको शुक्रबार (मंसिर ७) गते अनुमति दिएको हो । कम्पनीलाई चुक्तापुँजीको ३० प्रतिशत अर्थात अंकित मूल्य १०० रुपैयाँका २२ लाख ५० हजार कित्ता आईपीओ निष्कासन गर्न बोर्डले अनुमति दिएको छ । तर, एक्कर्ड फर्मास्युटिकल्स र ट्रेड टावरले २०७९ मा नै आईपीओ निष्कासन गर्न आवेदन दिएका थिए ।

यीबाहेक २०८० सालमा पनि धेरै कम्पनीले आईपीओ निष्कासन गर्न आवेदन दिएका छन् । ती कम्पनीले भने आईपीओ निष्कासनको अनुमति पाएका छैनन् । तर, दुई वर्षअघि खुलेर दुई महिनाअगाडि मात्रै आईपीओ निष्कासन गर्न अनुमति पाउनुलाई अस्वभाविक रूपमा लिइएको छ ।

माइक्रो इन्स्योरेन्सको व्यवसायमा नेपाल बिमा प्राधिकरण सन्तुष्ट छैन । तर, माइक्रो लाइफ र नन् लाइफ इन्स्योरेन्सले आईपीओ निष्कासन गर्न आवेदन दिनेबित्तिकै स्वीकृति पाउनुलाई व्यावसायिक घरानासँग हालका अध्यक्ष बरालको ट्युनिङ मिलेको बुझिन्छ । महिनौदेखि आवेदन दिएका कम्पनीको नाम सार्वजनिक नगरेको बोर्डले एक्कासि ७७ कम्पनीको नामावली सार्वजनिक गरेको थियो । त्यसलगतै नयाँ अध्यक्षको प्रक्रिया अगाडि बढ्नासाथ गार्डियनले आईपीओ निष्कासन स्वीकृति पाउनुलाई पनि अस्वभाविक मान्न सकिने बजारका जानकारहरू बताउँछन् ।

यो कम्पनीले गत आर्थिक वर्ष २०८०/०८१ मा १४ लाख रुपैयाँ नाफा गरेको छ । यो कम्पनीको चुक्तापुँजी ५२ करोड ५० लाख रुपैयाँ छ ।