काठमाडौं । सरकारले सार्वभौम क्रेडिट रेटिङमा नेपालले प्राप्त गरेको सफलताले सरकार, निजी क्षेत्र र सम्पूर्ण लगानीकर्ताको लागि उत्साह सिर्जना भएको जनाएको छ ।

नेपालले सार्वभौम क्रेडिट रेटिङमा ‘बीबी माइनस’स्कोर प्राप्त गर्न सफल भएपछि शुक्रबार सिंहदरबारमा पत्रकार सम्मेलन गर्दै उपप्रधान एवं अर्थमन्त्री विष्णुप्रसाद पौडेलले सरकार, निजी क्षेत्र र सम्पूर्ण लगानीकर्ताका लागि उत्साह सिर्जना भएको बताए । उनले नेपाल लगानीका लागि अनुकूल स्थान भएको सन्देश विश्वभरी नै गएको बताए ।

सार्वभौम क्रेडिट रेटिङलाई विश्वका लगानीकर्ता तथा वित्तीय सेवा प्रदान गर्ने निकायले कुनै पनि मुलुकको लगानीको वातावरण मूल्यांकनको आधारको रूपमा लिने गरेको उनले बताए । यो सार्वभौम क्रेडिट रेटिङले नेपालको अर्थतन्त्रलाई अन्तर्राष्ट्रिय समूदायसम्म प्रस्तुत गरेको र यसले सकारात्मक सन्देश दिएको मन्त्री पौडेलको भनाइ छ । 

मन्त्री पौडेलले आगामी दिनमा नेपालको पूर्वाधार, पर्यटन, कृषि, सेवालगायत  क्षेत्रका ठूला आयोजनाहरू मा बढ्ने विश्वास व्यक्त गरे ।

अन्तर्राष्ट्रिय रेटिङ कम्पनी फिच रेटिङद्वारा नेपालले सार्वजनिक वित्त परिचालन र समष्टिगत आर्थिक तथा वित्तीय अवस्था लगानीमैत्री र उन्नत रहेको संकेत गर्ने ‘बीबी माइनस’ रेटिङ प्राप्त गरेको छ । कम्पनीले रेटिङ ‘डी’ देखि ‘एएए’ सम्म रेटिङ प्रदान गर्ने गरेको छ ।

‘एएए’ रेटिङले मुलुकको आर्थिक गतिविधि तथा लगानीको सम्भावना राम्रो छ भन्ने बुझाउँछ । ‘डी’ले ऋण तिर्नसक्ने अवस्था कमजोर तथा लगानी जोखिमको संकेत गर्छ ।