काठमाडौं । काठमाडौं शङ्खरापुर नगरपालिका–९ ईद्रायणीस्थित साँखु–थली सडकखण्डमा कारको ठक्करबाट एक जनाको मृत्यु भएको घटनामा पक्राउ परेका प्रकाश भुजेलविरुद्ध अनुसन्धान गर्न पाँच दिन म्याद थप गरिएको छ । 

जिल्ला अदालत काठमाडौंले भुजेललाई आज पाँच दिन हिरासतमा राखेर अनुसन्धान गर्न अनुमति दिएको जिल्ला प्रहरी परिसर काठमाडौंका प्रवक्ता एवं प्रहरी उपरीक्षक नवराज अधिकारीले जानकारी दिए ।

बुधबार दिउँसो काठमाडाैं शङ्खरापुर नगरपालिका–९ ईद्रायणीस्थित साँखु–थली सडकखण्डमा थलीबाट साँखुतर्फ आउँदै गर्दा प्रकाश भुजेलले चलाएको बा १९ च २६९५ नम्बरको कारको ठक्करबाट बाप्र–०२–०१८ प ६८७५ नम्बरको मोटरसाइल चालक कागेश्वरी मनोहरा–२ का ३८ वर्षीय नारायण नगरकोटीको मृत्यु भएको थियो ।

भुजेलले चलाएको कारको ठक्करबाट वाइकमा सवार मृतक नारायणकी श्रीमती ३२ वर्षीया सानुमायाँ नगरकोटी गम्भीर घाइते भएकी र उनको अस्पतालमा उपचार भइरहेको छ । रासस