काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेलाई रुपन्देहीको भैरहवा लगिएको छ । सहकारी संस्थाको बचत रकम हिनामिना प्रकरणमा प्रहरी हिरासतमा रहेका उनलाई मंगलबार कास्कीको पोखराबाट भैरहवा लगिएको हो । बुद्ध एयरको विमानमार्फत उनलाई भैरहवा लागिएको रास्वपा नेताहरूले जनाएका छन् ।

बुटवलमा कार्यालय रहेको सुप्रिम बचत तथा ऋण सहकारी संस्थाको रकम हिनामिना प्रकरणमा पनि उनी मुछिएका छन् । सोही आरोपमा त्यहाँ उनको बयान लिइनेछ । बयान लिएपछि उनलाई कास्की नै पठाइने रुपन्देही प्रहरीले जनाएको छ ।

सुप्रिम सहकारीबाट लामिछाने प्रबन्ध निर्देशक रहेको गोर्खा मिडिया नेटवर्कमा १४ करोड २९ लाख ३६ हजार रुपैयाँ गैरकानुनी तरिकाले लगेको पाइएको छ । उक्त सहकारीबाट एक करोड ९६ लाख लामिछानेकै नाममा रहेको बैंक खातामा गएको देखिएको छ ।

यही कात्तिक २ गते उनलाई काठमाडौंस्थित रास्वपाको केन्द्रीय कार्यालयबाट पक्राउ गरिएको थियो । सूर्यदर्शन बचत तथा ऋण सहकारी संस्थाको रकम अपचलन प्रकरणमा पक्राउ गरी उनलाई पोखरा लगिएको थियो ।

उनीमाथि अनुसन्धानका निम्ति कास्की जिल्ला अदालतले पछिल्लोपल्ट १३ दिन म्याद थप गरेको छ । सहकारी ठगी, संगठित अपराध र सम्पत्ति शुद्धीकरणसम्बन्धी कसुरमा उनीमाथि अनुसन्धान जारी छ ।

सहकारी संस्था बचत रकम दुरुपयोग सम्बन्धमा संसदीय छानबिन विशेष समितिले लामिछानेलाई कारबाही सिफारिस गरेको थियो । समितिले ९९ दिन लगाएर तयार पारेको प्रतिवेदन गएको भदौ ३१ गते सभामुख देवराज घिमिरेलाई बुझाएको थियो । उक्त प्रतिवेदन गृह मन्त्रालयले असोज पहिलो साता प्रहरीलाई कार्यान्वयनका निम्ति पठाएको थियो ।