काठमाडौं । चालु आर्थिक वर्ष २०८१/०८२ को तीन महिनामा ३८ अर्ब ३७ करोड ८७ लाख रुपैयाँको वस्तु तथा सेवा निर्यात भएको छ । निर्यातको कुल हिस्सामध्ये त्रिभुवन अन्तर्राष्ट्रिय विमानस्थल भन्सारबाट २५.८४ प्रतिशत छ ।

चालु आर्थिक वर्षको साउन, भदौ र असोज महिनामा त्रिभुवन विमानस्थिल भन्सारबाट नौ अर्ब ९० करोड ८३ लाख रुपैयाँको वस्तु तथा सेवा निर्यात भएको भन्सार विभागको तथ्यांक छ ।

तर, यो भन्सारबाट तीन महिनाको अवधिमा ३० अर्ब ६२ करोड रुपैयाँको वस्तु तथा सेवा आयात भएको छ । यो भन्सारबाट बढी रकमको आयात देखिएको भए पनि कुल वस्तु तथा सेवा आयातको मात्रा हेर्दा यो भन्सारबाट कुल आयातको ७.८४ प्रतिशत मात्र हो ।

चालु आर्थिक वर्षको तीन महिनामा तीन खर्ब ९० अब ७५ करोड २३ लाख रुपैयाँको आयात भएको छ । यो आयात २७ वटा भन्सारबाट भएको हो । २७ भन्सारमध्ये वस्तु तथा सेवा आयातको हिसाबमा त्रिभुवन विमानस्थल भन्सार पाँच नम्बरमा छ । यो भन्सारबाट हुने आयातभन्दा बढी भैरहवा, सुक्खा बन्दरगाह र विराटनगर भन्सारबाट हुन्छ । कुल आयातको १६.२५ प्रतिशत भैरहवाबाट सक्खा बन्दरगाहबाट १४.१९ प्रतिशत र विराटनगर भन्सारबाट १०.७३ प्रतिशत नेपालमा भित्रिन्छ ।  

सबैभन्दा बढी आयात वीरगञ्ज भन्सारबाट भएको छ । यो भन्सारबाट एक खर्ब २७ अर्ब ८९ करोड ३६ लाख रुपैयाँको वस्तु तथा सेवा आयात भएको छ । यो कुल आयातको ३२.७३ प्रतिशत हो । वीरगञ्ज भन्सारबाट सात अर्ब ५७ करोड ६२ लाख रुपैयाँको निर्यात भएको छ । यो कुल निर्यातको १९.७४ प्रतिशत हो ।

११ भन्सारबाट निर्यात शून्य
तीन महिनाको अवधिमा ११ भन्सार कार्यालयबाट नियात शून्य छ । यसरी वस्तु तथा सेवा निर्यात नहुने तातोपानी, सुठौली, जनकपुर, सुनसरी, चोभार, भद्रपुर, सती, महेशपौर, राजविराज, ठाढी र त्रिभेनी भन्सार छन् । त्रिभेनी भन्सारबाट दुई लाख चार हजारको आयात भएको छ भने ठाढी भन्सारबाट ५३ लाख पाँच हजार रुपैयाँको आयात भएको छ ।

राजविराज भन्सारबाट भने तीन करोड ५१ लाख रुपैयाँको आयात भएको छ । वस्तु तथा सेवा निर्यात नभएका यी ११ भन्सार कार्यालयमध्ये सबैभन्दा बढी तातोपानी भन्सारबाट आयात भएको छ । यो भन्सारबाट १२ अर्ब पाँच करोड ४२ लाख रुपैयाँको वस्तु तथा सेवा आयात भएको छ ।