विराटनगर । विराटनगरमा जारी नरेश श्रेष्ठ मेमोरियल वाईवाई पुरुष यू–१९ राष्ट्रिय क्रिकेट प्रतियोगितामा लुम्बिनी र गण्डकी प्रदेश विजयी भएका छन् । 

बुधबार बैजानाथपुरको गिरिजाप्रसाद कोइराला खेल मैदानमा भएको खेलमा लुम्बिनीले कर्णाली प्रदेशलाई ६ विकेटले पराजित गरेको छ । टस हारेर ब्याटिङ गरेको कर्णालीले निर्धारित ५० ओभरको खेलमा ३७.३ ओभरमा सबै विकेट गुमाएर ९९ रनको झिनो योगफल बनायो । कर्णालीका अरविन्द घर्तीले सर्वाधिक २० रन बनाए । भुपेन्द्र शाहीले १९ रनको योगदान दिए ।

लुम्बिनीका सन्तोष यादवले सर्वाधिक ६ विकेट विकेट लिए । उनले १० ओभरमा तीन मेडन ओभर गर्दै १९ रन मात्र दिए । यादव खेलको 'प्लेयर अफ म्याच' घोषित भए ।

जितका लागि १०० रनको सामान्य लक्ष्य पाएको लुम्बिनीले २६.४ बलमा चार विकेट गुमाएर पूरा गर्‍यो । लुम्बिनीका दर्ष सोनारले २० रन बनाउँदा समिचर असिसलले पनि नटआउट २० रन जोडे ।

कर्णालीका युनिश ठकुरी र अनुज चनराले समान दुई–दुई विकेट दिए । खेलेका तीनवटै खेलमा जित निकालेको  लुम्बिनी शीर्ष स्थानमा उक्लिएको छ । कर्णालीले खेलेका दुई खेलमा पराजित हुँदै पुछारमा रहेको छ ।

त्यसैगरी, मेर्लिबोन ज्वाला क्रिकेट मैदानमा आजै भएको अर्काे खेलमा गण्डकीले घरेलु टोली कोसी प्रदेशलाई ११४ रनले पराजित गरेको छ । टस जितेर ब्याटिङ गरेको गण्डकीले निर्धारित ५० ओभरमा नौ विकेट गुमाएर २०८ रन बनायो । गण्डकीका सिब्रिन श्रेष्ठले ५३ रन बनाए । अर्जुन कुमालले ४६ रन बनाए ।

कोसीका रोशन साहले चार विकेट लिँदा विपीन महतोले तीन विकेट लिए ।

जितका लागि २०९ रनको लक्ष्य पाएको कोसीले ३३ ओभरमा सबै विकेट गुमाएर ९४ रनमात्र बनाउन सक्यो । कोसीका सोनु अन्सारीले सर्वाधिक ३४ रन बनाए ।

गण्डकीका अर्जुन कुमालले चार विकेट लिँदा अपराजित पौडेलले तीन विकेट लिए । 'प्लेयर अफ द' म्याच गण्डकीका सिब्रिन श्रेष्ठ भए । गण्डकी चार अंकका साथ दोस्रो स्थान उक्लिएको छ । तीन खेल खेलेर पनि जितविहीन कोसी छैठौँ स्थानमा छ ।

विहीबारको खेल बैजानाथपुरको गिरिजाप्रसाद कोइराला खेल मैदानमा गण्डकी र सूदुरपश्चिम प्रदेश तथा मेर्लिबोन ज्वाला क्रिकेट मैदानमा वागमती र लुम्बिनी प्रदेशबीच खेल हुनेछ ।