काठमाडौं । रोवर्ट लेवान्डोवस्कीले दुई मिनेटभित्र तीन गोल गरेपछि स्पेनिस ला लिगामा लिग लिडर बार्सिलोनाले रियाल मड्रिडलाई उसैको घरमा ४–० ले पराजित गरेको छ ।

शनिबार राति सान्टियागो बर्नबेउमा सम्पन्न खेलमा क्याटालन क्लबलाई जित दिलाउन लेवान्डोवस्कीले दुई गोल गरे । यस्तै, युवा फरवार्ड लामिन यमल र राफिन्हाले समान एक गोल थपे । च्याम्पियन्स लिगमा जर्मन क्लब बायर्न म्युनिखलाई ४–१ ले हराएको तेस्रो दिनमै बार्सिलोनाले रियाललाई उसैको घरमा स्तब्ध बनाएको हो ।

खेलको सबै गोल दोस्रो हाफमा भएको थियो । ५४औँ मिनेटमा लेवान्डोवस्कीले गोल गर्दै बार्सिलोनालाई अग्रतामा राखेका थिए । त्यसको दुई मिनेटपछि लेवान्डोवस्कीले नै पाहुना टिमको अग्रता दोब्बर बनाए ।

७७औँ मिनेटमा यमलको गोलमा बार्सिलोनाले अग्रतालाई ३–० मा पुर्‍याएको थियो । यस्तै, खेलको निर्धारित समय सकिन ६ मिनेट बाँकी रहँदा राफिन्हाले गोल गरेपछि बार्सिलोनाले ४–० को जित पक्का गरेको हो ।

जितसँगै बार्सिलोनाले तालिकाको शीर्ष स्थानमा ६ अंकको स्पष्ट अग्रता बनाएको छ । तालिकाको शीर्ष स्थानमा आसिन बार्सिलोनाले ११ खेलबाट ३० अंक जोडेको छ । बार्सिलोनाले १० खेलमा जित र एक खेलमा हारको नतिजा आत्मसाथ गरेको छ ।

समान खेलबाट २४ अंक जोडेको रियाल तालिकाको दोस्रो स्थानमा छ । रियालले सात खेलमा जित निकाल्दा तीन खेलमा बराबरी र एक खेलमा हार बेहोरेको छ । लिगमा रियालको यो पहिलो हार समेत हो ।